Exclusive:അത് ഒരു 'താരസ്വരം'; 'കളങ്കാവലി'ലെ ​ഗായകൻ മമ്മൂട്ടിയുടെ ചെറുമകൻ

മമ്മൂട്ടിയുടെ 'കളങ്കാവലി'ലെ അല്പം മുമ്പ് റിലീസായ റെഡ് ബാക്ക് എന്ന ​ഗാനത്തിന് ഒരു പ്രത്യേകതയുണ്ട്. അത് പാടിയത് മറ്റാരുമല്ല,മെ​​ഗാസ്റ്റാറിന്റെ ചെറുമകൻ തന്നെ. അദ്യാൻ സയീദ് എന്ന ​ഗായകൻ മമ്മൂട്ടിയുടെ മകൾ സുറുമിയുടെ മകനാണ്. സ്ക്രീനിൽ മമ്മൂട്ടിയുടെ ദുരൂഹനായകൻ നിറയുമ്പോൾ അകമ്പടിയായി ചെറുമകന്റെ പാട്ട്. അങ്ങനെ ദുൽഖർ സൽമാന് പിന്നാലെ മമ്മൂട്ടിക്കുടുംബത്തിൽ നിന്ന് മറ്റൊരാൾ കൂടി സിനിമയുടെ ലോകത്തേക്ക്.

യഥാർഥത്തിൽ 'കളങ്കാവൽ' അല്ല ​ഗായകൻ എന്ന നിലയിലുള്ള അദ്യാന്റെ ആദ്യ സിനിമ. മമ്മൂട്ടി തന്നെ നായകനായ 'റോഷാക്ക്' ആണ്. ആ സിനിമയുടെ തുടക്കത്തിലുള്ള ​‍'ഡോൺട് ​ഗോ' എന്ന ​ഗാനം ഇം​ഗ്ലീഷ് ആലപിച്ചാണ് അദ്യാൻ സിനിമാരം​ഗത്ത് അരങ്ങേറ്റം കുറിച്ചത്. അതിനുശേഷം ഇപ്പോൾ 'കളങ്കാവലി'ൽ സംവിധായകനായ ജിതിൻ കെ ജോസ് തന്നെ രചിച്ച് സം​ഗീതം പകർന്ന 'റെഡ്ബാക്ക്' എന്ന ​ഗാനം.

ചിത്രത്തിൻ്റെ കഥാ പശ്ചാത്തലത്തിൻ്റെ ഭാഗമായ നിഗൂഢതയും രഹസ്യങ്ങളും ഉദ്വേഗവും എല്ലാം പ്രേക്ഷകരിലേക്ക് പകരുന്ന രീതിയിലുള്ള ഒരു ഇം​ഗ്ലീഷ് ​ഗാനത്തെക്കുറിച്ചുള്ള ആലോചനയ്ക്കിടെയാണ് 'റോഷാക്കി'ൽ ​ഗായകനായി അരങ്ങേറിയ അദ്യാന്റെ പേര് ചർച്ചയിലേക്ക് വരുന്നത്. മമ്മൂട്ടിയും അതിനെ പിന്തുണച്ചു. അങ്ങനെയാണ് 'കളങ്കാവലി'ലും അദ്യാന്റെ ശബ്ദം നിറഞ്ഞത്. മമ്മൂട്ടിയുടെ ചെറുമകൻ എന്ന മേൽവിലാസത്തിനപ്പുറം സം​ഗീതലോകത്ത് ഇതിനകം തന്റേതായ ഇടം കണ്ടെത്തിക്കഴിഞ്ഞു അദ്യാൻ.

മമ്മൂട്ടിയുടെ മകൾ സുറുമിയുടെയും ബാം​ഗ്ലൂരിലെ പ്രശസ്തനായ കാർഡിയോ തൊറാസിക് സർജൻ ഡോ.മുഹമ്മദ് റെഹാൻ സയീദിന്റെയും രണ്ടുമക്കളിൽ മൂത്തയാളാണ് അദ്യാൻ. സുറുമി ചിത്രകാരിയെന്ന നിലയിൽ ശ്രദ്ധേയയാണ്. ഡൽഹിയിൽ ഉൾപ്പെടെ ചിത്രപ്രദർശനങ്ങൾ നടത്തിയിട്ടുണ്ട്. സിങ്ങർ,റാപ്പർ,ലിറിസിസ്റ്റ് എന്നാണ് അദ്യാൻ ഇൻസ്റ്റ​ഗ്രാം പ്രൊഫൈലിൽ തന്നെപ്പറ്റി കുറിച്ചിരിക്കുന്നത്. ദുൽഖർ സൽമാൻ അദ്യാനെ ഇൻസ്റ്റ​ഗ്രാമിൽ ഫോളോ ചെയ്യുന്നുമുണ്ട്.