ഷാനവാസ് നിത്യഹരിതസ്മരണ;ഖബറടക്കം ഇന്ന് വൈകിട്ട്

നിത്യഹരിതനായകൻ പ്രേംനസീറിന്റെ മക‍നും അഭിനേതാവുമായ ഷാനവാസ്(70)അന്തരിച്ചു. തിങ്കളാഴ്ച രാത്രി 11.50ഓടെ തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. നാലുവർഷമായി വൃക്കരോ​ഗത്തിനും ഹൃദ്രോ​ഗത്തിനും ചികിത്സയിലായിരുന്നു. രാത്രിയോടെ അസുഖം മൂർച്ഛിച്ചതിനെത്തുടർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ചൊവ്വാഴ്ച മൂന്നുമണിവരെ വഴുതക്കാട്ടെ വീട്ടിൽ പൊതുദർശനം. വൈകിട്ട് അഞ്ചിന് പാളയം മുസ്ലിം ജമാ അത്ത് പള്ളി ഖബർസ്ഥാനിലാണ് ഖബറടക്കം.

ഭാര്യ: അയിഷ അബ്ദുൾ അസീസ്. മക്കൾ: അജിത് ഖാൻ,ഷമീർഖാൻ. മരുമകൾ: ഹന.

തിരുവനന്തപുരത്താണ് ഷാനവാസിന്റെ ജനനം. ചിറയിൻകീഴ് ഇംഗ്ലീഷ് മീഡിയം,യേർക്കാട് മോണ്ട് ഫോർട്ട് സ്കൂൾ എന്നിവിടങ്ങളിൽ നിന്ന് പ്രാഥമിക വിദ്യാഭ്യാസം പൂർത്തിയാക്കി. ചെന്നൈ ന്യൂ കോളേജിൽ നിന്ന് ഇംഗ്ലീഷ് സാഹിത്യത്തിൽ മാസ്റ്റേഴ്സ് ബിരുദം നേടി.

1962-ൽ 'കാല്പാടുകൾ' എന്ന സിനിമയിൽ ബാലനടനായാണ് ഷാനവാസ് ആദ്യമായി അഭിനയിക്കുന്നത്.പിന്നീട് 1978-ൽ 'ആശ്രമം' എന്ന സിനിമയിലഭിനയിച്ചു. ബാലചന്ദ്രമേനോൻ സംവിധാനം ചെയ്ത്,1981-ൽ റിലീസ് ചെയ്ത 'പ്രേമഗീത'ങ്ങളാണ് നായകനായ ആദ്യസിനിമ. അജിത് എന്നായിരുന്നു കഥാപാത്രത്തിന്റെ പേര്. ആ സിനിമയുടെ വിജയം ഷാനവാസിനെ മലയാളത്തിലെ മുൻനിര നടനാക്കിമാറ്റി.1980-കളുടെ അവസാനം വരെ ധാരാളം സിനിമകളിൽ നായകനായും ഉപനായകനായും അഭിനയിച്ചു. 'ഇവൻ ഒരു സിംഹ'മാണ് പ്രേംനസീറും ഷാനവാസും ഒന്നിച്ചഭിനയിച്ച ആദ്യസിനിമ.

മഴനിലാവ്, പ്രശ്നം ഗുരുതരം,ഹിമം,മിഥ്യ,അർഹത,നീലഗിരി,വീരപുത്രൻ,സക്കറിയയുടെ ഗർഭിണികൾ,ജന​ഗണമന തുടങ്ങി മലയാളത്തിലും തമിഴിലുമായി അമ്പതിലധികം ചിത്രങ്ങളിൽ അഭിനയിച്ചിട്ടുണ്ട്. ശംഖുപുഷ്പം, കടമറ്റത്ത് കത്തനാർ,അമ്മത്തൊട്ടിൽ,മനസ്സറിയാതെ തുടങ്ങിയ സീരിയലുകളിലൂടെയും ടെലിവിഷനിലും ശ്രദ്ധേയനായി