മമ്മൂട്ടിയുടെ ജന്മദിനത്തിന് വേറിട്ട ആദരം; 7500 പേരുടെ രക്തദാനവുമായി എംജിഎം ഗ്രൂപ്പ്

മമ്മൂട്ടിയുടെ ജന്മദിനത്തോടനുബന്ധിച്ച് മമ്മൂട്ടി ഫാൻസ് ആൻഡ് വെൽഫെയർ അസോസിയേഷൻ ഇന്റർനാഷണൽ സംഘടിപ്പിക്കുന്ന 40,000 യൂണിറ്റ് രക്തദാനം എന്ന വലിയ ക്യാമ്പയിനിന് പിന്തുണയുമായി കേരളത്തിലെ വിവിധ ജില്ലകളിലായി മുപ്പത് വിദ്യാഭ്യാസ സ്ഥാപനങ്ങളുടെ ശൃംഖലയായ എംജിഎം ഗ്രൂപ്പ്.

എംജിഎം ഗ്രൂപ്പിന്റെ കീഴിലുള്ള വിവിധ വിദ്യാഭ്യാസ സ്ഥാപനങ്ങളിൽ നിന്നുള്ള വിദ്യാർത്ഥികൾ, അധ്യാപകർ, പി.ടി.എ. പ്രതിനിധികൾ,നാട്ടുകാർ എന്നിവരടങ്ങുന്ന വലിയൊരു കൂട്ടായ്മയാണ് ഈ രക്തദാന ക്യാമ്പയിനിന്റെ ഭാഗമാകുന്നത്. എംജിഎമ്മിന്റെ വിവിധ വിദ്യാഭ്യാസ സ്ഥാപനങ്ങളിൽ സംഘടിപ്പിക്കുന്ന രക്തദാന ക്യാമ്പുകളിലൂടെയാണ് ഈ മഹത്തായ ജീവകാരുണ്യ പ്രവർത്തനം നടപ്പാക്കുന്നത്.അതാതു സ്ഥാപനങ്ങളിലെ എൻഎസ്എസ് യൂണിറ്റുകൾ ആണ് രക്തദാന ക്യാമ്പയിനുകൾ ഏകോപിപ്പിക്കുന്നത്.

'ജീവാമൃതം' എന്ന പേരിൽ എംജിഎം ഗ്രൂപ്പ് സംഘടിപ്പിക്കുന്ന രക്തദാന ക്യാമ്പയിനിന്റെ ഔദ്യോഗിക ഉദ്ഘാടനം സെപ്റ്റംബർ 8-ന് തിരുവനന്തപുരത്ത് സംസ്ഥാന ആഭ്യന്തര മന്ത്രി രമേശ്‌ ചെന്നിത്തല നിർവഹിക്കും. മമ്മൂട്ടിയുടെ ജന്മദിനത്തിന്റെ പിറ്റേന്ന് നടക്കുന്ന ചടങ്ങിൽ പ്രമുഖർ പങ്കെടുക്കും.

മമ്മൂട്ടി ഫാൻസ് ആൻഡ് വെൽഫെയർ അസോസിയേഷൻ ഇന്റർനാഷണൽ രൂപം നൽകിയ രക്തദാന ക്യാമ്പയിൻ കഴിഞ്ഞ മാസമാണ് ആരംഭിച്ചത്. ഒരു മാസത്തിലേറെ നീണ്ടുനിൽക്കുന്ന ഈ രക്തദാനമഹായജ്ഞത്തിൽ ലോകത്തിന്റെ വിവിധ ഭാഗങ്ങളിൽ നിന്നായി 17 രാജ്യങ്ങളിലെ രക്തദാതാക്കൾ പങ്കെടുക്കുന്നുണ്ട്.

മമ്മൂട്ടി ആരാധകർക്ക് പുറമെ വിവിധ മലയാളി സംഘടനകൾ, വ്യാപാര-വ്യവസായ സമൂഹങ്ങൾ, സാമൂഹിക സംഘടനകൾ, കോർപ്പറേറ്റ് സ്ഥാപനങ്ങൾ, ജനപ്രതിനിധികൾ തുടങ്ങി സമൂഹത്തിന്റെ വിവിധ മേഖലകളിലുള്ളവർ ക്യാമ്പയിനിന് പിന്തുണ പ്രഖ്യാപിക്കുകയും ഇതിനോടകം പദ്ധതിയുടെ ഭാഗമാകുകയും ചെയ്തിട്ടുണ്ട്. മമ്മൂട്ടിയുടെ ജന്മദിനത്തെ സാമൂഹിക സേവനത്തിനുള്ള അവസരമാക്കി മാറ്റുന്ന ഈ സംരംഭം ഇതിനോടകം തന്നെ വലിയ ജനപിന്തുണ നേടിയിട്ടുണ്ട്.

'സംസ്ഥാനത്തെ യുവാക്കൾ ഒരുമിച്ച് ചേർന്ന് തുടക്കം കുറിച്ചിരിക്കുന്ന ഈ രക്തദാന ക്യാമ്പയിൻ ലോകത്തിന് തന്നെ മാതൃകയാകുന്ന ഒരു മഹത്തായ സാമൂഹിക സംരംഭമാണ്. രക്തദാനത്തിലൂടെ അനേകം ജീവനുകൾക്ക് പ്രതീക്ഷയും പുതുജീവനും നൽകാൻ കഴിയുന്ന ഈ പദ്ധതിക്ക് പരമാവധി പിന്തുണ ഉറപ്പാക്കുക എന്നതാണ് എംജിഎം ഗ്രൂപ്പിന്റെ ലക്ഷ്യം. വിദ്യാർത്ഥികളും യുവജനങ്ങളും അധ്യാപകരും പി.ടി.എ. പ്രതിനിധികളും ഉൾപ്പെടെ സമൂഹത്തിന്റെ വിവിധ വിഭാഗങ്ങൾ ഇത്തരം ജീവകാരുണ്യ പ്രവർത്തനങ്ങളിൽ സജീവമായി പങ്കാളികളാകുന്നത് വലിയൊരു സാമൂഹിക മാറ്റത്തിന് വഴിയൊരുക്കും'- എംജിഎം ഗ്രൂപ്പ് ചെയർമാൻ ഡോ. ഗീവർഗീസ് യോഹന്നാൻ പറഞ്ഞു.

എംജിഎമ്മിന്റെ വിവിധ വിദ്യാഭ്യാസ സ്ഥാപനങ്ങളിൽ നടക്കുന്ന രക്തദാന ക്യാമ്പുകളിലേക്ക് സംസ്ഥാനത്തെ വിവിധ ഗവൺമെന്റ് മെഡിക്കൽ കോളേജുകളുടെയും അംഗീകൃത രക്തബാങ്കുകളുടെയും സഹകരണം ലഭിക്കുന്നുണ്ട്. ആവശ്യമായ മെഡിക്കൽ സൗകര്യങ്ങളും വിദഗ്ധരുടെ മേൽനോട്ടവും ഉറപ്പാക്കിയാണ് ക്യാമ്പുകൾ സംഘടിപ്പിക്കുന്നത്. വിവരങ്ങൾക്ക്: 7902997111

മമ്മൂട്ടിയുടെ ജീവകാരുണ്യപ്രസ്ഥാനവുമായ കെയർ ആന്റ് ഷെയർ ഇന്റർനാഷണലുമായി വിവിധ സാമൂഹികസേവനപദ്ധതികളിൽ ചേർന്നുപ്രവർത്തിക്കുന്നുണ്ട് എംജിഎം എജ്യുക്കേഷണൽ ​ഗ്രൂപ്പ്. നിർധനവിദ്യാർഥികൾക്ക് സൗജന്യപഠനത്തിനുള്ള അവസരമൊരുക്കുന്ന വിദ്യാമൃതം ആണ് ഇതിൽ പ്രധാനം.