ജോഷിയും ജോജുവും വീണ്ടും;നിന്റെ ഭൂമിയും ആകാശവുമായി 'കനാൻദേശം'

മലയാള സിനിമയിലെ ദശാബ്ദങ്ങളെ തന്റേതാക്കി മാറ്റിയ മാസ്റ്റർ ഡയറക്ടർ ജോഷിയും ജോജു ജോർജും കൂട്ട് കെട്ട് വീണ്ടും ഒന്നിക്കുന്നു. പൊറിഞ്ചു മറിയം ജോസ്', 'ആന്റണി' എന്നീ വമ്പൻ വിജയങ്ങൾക്ക് ശേഷം ജോഷി-കൂട്ടുകെട്ടിലൊരുങ്ങുന്ന ചിത്രത്തിന്റെ പേര് 'കനാൻദേശം'. 'ഇത് നിന്റെ ഭൂമി നിന്റെ ആകാശം' എന്ന പവർഫുൾ ടാഗ്‌ലൈനോടെയാണ് ചിത്രം എത്തുന്നത്. അനൂപ് മേനോനാണ് തിരക്കഥ.

ജോഷിക്കുള്ള ആദരം പോലെയൊരുക്കിയ വീഡിയോയിലൂടെയായിരുന്നു 'കനാൻദേശ'ത്തിന്റെ പ്രഖ്യാപനം. ആന്റണിയാണ് ജോഷിയും ജോജുവും ഒരുമിച്ച അവസാനചിത്രം.

അപ്പു പാത്തു പപ്പു പ്രൊഡക്ഷൻസിന്റെ ബാനറിൽ സിജോ വടക്കനും വർക്കി ജോർജും ചേർന്ന് നിർമ്മിക്കുന്ന ഈ ബിഗ് ബജറ്റ് ചിത്രം അഞ്ചു ഭാഷകളിലായി തിയേറ്ററുകളിലെത്തും. മലയാളത്തിലെ വമ്പൻ താരനിരയും മികച്ച സാങ്കേതിക പ്രവർത്തകരും അണിനിരക്കുന്ന ചിത്രം ഒരു പാൻ-ഇന്ത്യൻ ലെവൽ എന്റർടെയ്നർ ആയിരിക്കുമെന്നാണ് അണിയറപ്രവർത്തകർ പറയുന്നത്. കോക് ടെയ്ൽ, ബ്യൂട്ടിഫുൾ, ട്രിവാൻഡ്രം ലോഡ്ജ്, തുടങ്ങിയ ചിത്രങ്ങൾക്കുശേഷം അനൂപ് മേനോൻ തിരക്കഥയെഴുതുന്ന സിനിമയാണിത്. ചിത്രത്തിന്റെ ഷൂട്ടിങ് ഈ ഓഗസ്റ്റിൽ ആരംഭിക്കും.