

ലോകം ഉറ്റുനോക്കിയ ബാഴ്സലോണ - റയൽ മാഡ്രിഡ് 'എൽ ക്ലാസികോ' പോരാട്ടമൈതാനത്ത് മലയാള സിനിമയുടെ വേറിട്ട ചരിത്രം. ടൊവിനോ തോമസും നസ്രിയ നസീമും പ്രധാന വേഷങ്ങളിലെത്തുന്ന പുതിയ ചിത്രത്തിന്റെ ടൈറ്റിൽ ലോഞ്ച് സ്പെയിനിലെ ക്യാമ്പ് നൗ സ്റ്റേഡിയത്തിൽ നടന്നു. 'ഗ്രേഷ്യസ് എൽ ക്ലാസികോ' (Gracias El Clasico) എന്നാണ് ചിത്രത്തിന് പേരിട്ടിരിക്കുന്നത്.
മത്സരത്തിന്റെ കിക്കോഫിനൊപ്പം സ്റ്റേഡിയത്തിലെ ഗാലറിയിലിരുന്നാണ് ടൊവിനോയും നസ്രിയയും ചേർന്ന് ടൈറ്റിൽ ലുക്ക് ഔദ്യോഗികമായി പുറത്തുവിട്ടത്. സ്പാനിഷ് സമയം രാത്രി 9-നും ഇന്ത്യൻ സമയം പുലർച്ചെ 12.30-നും താരങ്ങളുടെ സോഷ്യൽ മീഡിയ പേജുകളിലൂടെ ലൈവായാണ് ഈ പ്രഖ്യാപനം നടന്നത്. ഒരു മലയാള സിനിമയുടെ ടൈറ്റിൽ ലോഞ്ച് അന്താരാഷ്ട്ര കായിക വേദിയിൽ ഇത്തരത്തിൽ തത്സമയം നിർവഹിക്കപ്പെടുന്നത് ആദ്യമായാണ്.
ഒട്ടേറെ ഹിറ്റുകളുടെ തിരക്കഥാകൃത്തും സംവിധായകനുമായ മുഹ്സിൻ പരാരിയാണ് ചിത്രം സംവിധാനം ചെയ്യുന്നത്. 'സുഡാനി ഫ്രം നൈജീരിയ'യുടെ സംവിധായകൻ സക്കരിയയുമായി ചേർന്നാണ് മുഹ്സിൻ തിരക്കഥയൊരുക്കുന്നത്.
എ ആൻഡ് എച്ച് എസ് പ്രൊഡക്ഷൻസ്, ഹാപ്പി അവേഴ്സ് എന്റർടെയ്ൻമെന്റ്സ്, ബാബുഏട്ടൻ ഫിലിംസ്, ദ് റൈറ്റിങ് കമ്പനി എന്നീ ബാനറുകളിൽ സജിൻ അലി, അബ്ബാസ് തിരുനാവായ, സമീർ താഹിർ, ഷൈജു ഖാലിദ് എന്നിവർ ചേർന്നാണു നിർമാണം. കേരളത്തിലെയും സ്പെയിനിലെയും ഫുട്ബോൾ ആവേശത്തെ കോർത്തിണക്കുന്ന പ്രമേയമായിരിക്കും ചിത്രത്തിന്റേതെന്നാണ് ടൈറ്റിൽ നൽകുന്ന സൂചന.
കോ പ്രൊഡ്യൂസർ: പ്രദീപ് സിഎസ്, ഷാനിർ എംകെ, എക്സിക്യൂട്ടീവ് പ്രൊഡ്യൂസർ: ബിജേഷ് താമി, സംഗീതം: സുഷിൻ ശ്യാം, ഛായാഗ്രഹണം: വിഷ്ണു തണ്ടാശേരി, എഡിറ്റർ:ബ്ലെസ് തോമസ്, ക്രിയേറ്റീവ് ഡയറക്ടർ: ഹർഷദ് അലി, വസ്ത്രാലങ്കാരം: മഷർ ഹംസ,ലൈൻ പ്രൊഡ്യൂസർ:ഐഷ നസിയ, മേക്കപ്പ്: റോണക്സ് സേവ്യർ,പ്രൊഡക്ഷൻ ഡിസൈനർ:ഔസേപ്പ് ജോൺ,സൗണ്ട് ഡിസൈനർ:ഷിജിൻ ഹുട്ടൻ,സൗണ്ട് മിക്സർ:ഫസൽ എ.ബക്കർ,ചീഫ് അസോസിയേറ്റ് ഡയറക്ടർ:രാഹുൽ കൃഷ്ണൻ,ഫിനാൻസ് കൺട്രോളർ:ബിബിൻ സേവ്യർ,പ്രൊഡക്ഷൻ കൺട്രോളർ ആന്റണി തോമസ്,വിഎഫ്എക്സ്: എഗ് വൈറ്റ്,സ്റ്റിൽസ്:രോഹിത് കെ.സുരേഷ്,ഡിസൈൻ:യെല്ലോ ടൂത്ത്സ്,ടൈറ്റിൽ ഡിസൈൻ:ചാർളി ആന്റ് ദ് ബോയ്സ്.