'ഓടുന്ന കുതിര'യെ സ്വന്തമാക്കി ഫഹദ്,വില 13.75 കോടി

'ഓടും കുതിര ചാടും കുതിര' റിലീസായതിന് പിന്നാലെ 'ഓടുന്ന കുതിര' യെത്തന്നെ വീട്ടിലെത്തിച്ചിരിക്കുകയാണ് ഫഹദ് ഫാസിൽ. ഇറ്റാലിയൻ സ്പോർട്സ് കാർ നിർമാതാക്കളായ ഫെരാരിയുടെ വാഹന നിരയിലെ ഒരേയൊരു എസ്.യു.വി മോഡലായ പ്യുറോസാം​ഗ്വേ ആണ് ഫഫയുടെ ഗ്യാരേജിലെ പുതിയ അതിഥി. സിനിമകളുടെ തിരഞ്ഞെടുപ്പിലെപ്പോലെ വാഹനങ്ങളുടെ കാര്യത്തിലും വ്യത്യസ്തനാവുന്ന ഫഹദിന്റെ ഗ്യാരേജിലുംഈ വൈവിധ്യം കാണാം. ലംബോർ​ഗിനിയുടെ സൂപ്പർ എസ്.യു.വി മുതൽ ടൊയോട്ടയുടെ ആഡംബര എം.പി.വി വരെ അതിനെ അലങ്കരിക്കുന്നു.

12.13 കോടി രൂപയാണ് പ്യുറോസാം​ഗ്വേയുടെ ഡൽഹിയിലെ എക്സ്ഷോറൂം വില. ബിയാൻകോ സെര്വിനോ ഫിനീഷിങ്ങിലാണ് ഫഹദ് സ്വന്തമാക്കിയ പ്യുറോസാം​ഗ്വേ. കാർബൺ ഫൈബറിലെ ബമ്പർ ഗാർണിഷുകൾ ഉൾപ്പെടെയുള്ളവ ആക്സസറിയായി നല്കിയിട്ടുണ്ട്. അതിനാൽ വില പിന്നെയും കൂടിയിട്ടുണ്ടാവാം. ഇരട്ട നിറങ്ങളിലാണ് അലോയി വീൽ. നീല നിറത്തിലുള്ള അസൂറോ സാന്റോറിനി ലെതറിലാണ് അകത്തളം. സീറ്റുകളിലും ഡാഷ്ബോർഡിലും ബ്രേക്ക് കാലിപ്പറിലും ഉൾപ്പെടെ ഈ നിറമാണ്. പ്രീമിയം സ്റ്റിച്ചിങ്ങിനൊപ്പം ഫെരാരിയുടെ ലോഗോയും സീറ്റുകളിലുണ്ട്. കാർബൺ പാക്കേജാണ് അകത്തളത്തിന്റെ മറ്റൊരു പ്രത്യേകത.

6.5 ലിറ്റർ നാച്വറലി ആസ്പിരേറ്റഡ് പെട്രോൾ എൻജിനാണ് ഈ വാഹനത്തിന് കരുത്തേകുന്നത്. ഇത് 725 പിഎസ് പവറും 716 എൻ.എം ടോർക്കുമാണ് ഉത്പാദിപ്പിക്കുന്നത്. എഫ് 1 ഗിയർബോക്സ് എന്ന് അറിയപ്പെടുന്ന എട്ട് സ്പീഡ് വെറ്റ് ക്ലെച്ച് ഡ്യുവൽ ക്ലെച്ച് ഓട്ടോമാറ്റിക് ഗിയർബോക്സാണിതിൽ.

ആഡംബര വാഹനങ്ങളുടെ വലിയ ശേഖരമാണ് ഫഹദ് ഫാസിലിന്റെ ഗ്യാരേജിലുള്ളത്. റേഞ്ച് റോവർ ഓട്ടോബയോഗ്രഫി, ലംബോർ​ഗിനി ഉറൂസ്, മെഴ്സിഡീസ് ബെൻസ് ജിഎൽഎസ് 450, ലാൻഡ് റോവർ ഡിഫൻഡർ, പോർഷെ 911 കരേര എസ്, മെഴ്സിഡീസ് ജി 63 എ.എം.ജി, ടൊയോട്ട വെൽഫയർ, ഫോക്സ് വാ​ഗൺ ഗോൾഫ് ജിടിഐ, ലെക്സസ് എൽഎം 350 എച്ച് തുടങ്ങിയവ അതിലുണ്ട്.