ഛായാ​ഗ്രാഹകൻ ഷാജി കുമാർ അന്തരിച്ചു

മലയാള സിനിമയിലെ പ്രശസ്ത ഛായാഗ്രാഹകൻ ഷാജി കുമാർ (57) അന്തരിച്ചു. ദിലീപ് നായകനായ പുതിയ ചിത്രമായ ഹെനോക്കിന്റെ ഷൂട്ട് കഴിഞ്ഞ് ശനിയാഴ്ച രാത്രി ആലപ്പുഴയിലെ ഹോട്ടൽ മുറിയിലെത്തിയപ്പോഴാണ് ഷാജി കുമാറിന് ശാരീരിക അസ്വാസ്ഥ്യം അനുഭവപ്പെട്ടത്. ഷാജി തന്നെയാണ് ചിത്രത്തിന്റെ സംവിധായകൻ ഉല്ലാസ് കൃഷ്ണയെ വിവരം അറിയിച്ചത്. തുടർന്ന് തൊട്ടടുത്തുള്ള ആശുപത്രിയിലെത്തിച്ചു. അവിടെ നിന്ന് എറണാകുളം മെഡിക്കൽ ട്രസ്റ്റ് ആശുപത്രിയിലേക്കും. ഷാജികുമാർ ആരോഗ്യം വീണ്ടെടുത്ത് കൂടെയുള്ളവരോട് സാധാരണ പോലെ സംസാരിച്ചിരുന്നു. ഞായറാഴ്ച രാത്രിയിൽ വീണ്ടും ആരോഗ്യനില വഷളാകുകയും അന്ത്യം സംഭവിക്കുകയുമായിരുന്നു.

പ്രശസ്‌ത സിനിമാട്ടോഗ്രാഫർ വിപിൻ മോഹന്റെ ശിഷ്യനായി ഒട്ടേറെ സിനിമകളിൽ പ്രവർത്തിച്ച ഷാജി കുമാർ സ്വതന്ത്ര ഛായാഗ്രാഹകനായപ്പോൾ മലയാളത്തിലെ വൈവിധ്യമാർന്ന ചിത്രങ്ങൾക്ക് പിന്നിലെ കരുത്തായി മാറി. ഫിലിമിൽ ചിത്രീകരണം ആരംഭിച്ച ഷാജി കുമാർ വെളിച്ചത്തിലും നിറത്തിലും ഫ്രെയിമിങിലുമുള്ള തന്റെ അസാമാന്യമായ സാങ്കേതിക കലാപാടവം ഡിജിറ്റൽ സിനിമയിലും ആവർത്തിച്ചു. ക്യാമറയിലും ലൈറ്റിങ്ങിലും നിറവിന്യാസത്തിലും വന്ന കാലോചിതമായ മാറ്റങ്ങൾക്കൊപ്പം സഞ്ചരിച്ച് സ്വയം പുതുക്കിപ്പണിത്, കഥ പറച്ചിലിലെ പുതുമകൾ കൂടി ഉൾകൊണ്ട് ദൃശ്യ പരിചരണത്തിൽ തന്റേതായ കയ്യൊപ്പ് ചാർത്തി ക്യാമറ ചലിപ്പിപ്പിക്കുന്ന ഷാജി കുമാർ തന്റെ സമകാലീനർക്ക് കാലിടറിയ ഡിജിറ്റൽ ഫിലിം മേക്കിങ്ങിൽ മികച്ച വിജയങ്ങൾ തുടർച്ചയായി സമ്മാനിച്ചു.

ജോഷി, ഷാജി കൈലാസ്, വി.എം വിനു, എം.പത്മകുമാർ, വൈശാഖ് തുടങ്ങി പുതുതലമുറയിലെ തരുൺ മൂർത്തി വരെയുള്ള സംവിധായകരുടെ പ്രിയപ്പെട്ട ക്യാമറാമാനായിരുന്നു ഷാജി കുമാർ. മോഹൻലാൽ-തരുൺ മൂർത്തി ചിത്രമായ 'അതിമനോഹരം', സുരേഷ് ഗോപി ചിത്രമായ 'ഒറ്റക്കൊമ്പൻ' എന്നിവയാണ് അവസാനം ചിത്രീകരിച്ച സിനിമകൾ. തിരുവനന്തപുരം സ്വദേശിയായ ഷാജികുമാർ ദീർഘനാളായി പെരുമ്പാവൂരിലാണ് താമസിക്കുന്നത്.

ഭാര്യ: സ്മിത

മക്കൾ: ആര്യൻ, സൂര്യൻ

ഷാജി കുമാർ പ്രവർത്തിച്ച സിനിമകൾ

2001 ഉത്തമൻ

2002 വാൽക്കണ്ണാടി, പകൽപ്പൂരം, കന്മഷി

2003 അമ്മക്കിളിക്കൂട്, പട്ടണത്തിൽ സുന്ദരൻ

2004 ഞാൻ സൽപ്പേര് രാമൻകുട്ടി, വെള്ളിനക്ഷത്രം, സത്യം, വേഷം

2005 നരൻ, അദ്ഭുതദ്വീപ്,

2006 യെസ് യുവർ ഓണർ, മഹാസമുദ്രം, ബാബാ കല്യാണി

2007 ജൂലൈ 4, നസ്രാണി

2008 സൈക്കിൾ, വെറുതെ ഒരു ഭാര്യ

2009 റോബിൻഹുഡ്, റെഡ് ചില്ലീസ്

2010 പോക്കിരി രാജ

2011 ഡോക്ടർ ലവ്, സീനിയേഴ്സ്, മാമ്പട്ടിയാൻ, പൊന്നർ ശങ്കർ

2012 ദ കിങ് ആൻഡ് ദി കമ്മീഷണർ, മല്ലുസിങ്, മദിരാശി, സിംഹാസനം

2013 ശൃം​ഗാരവേലൻ, സൗണ്ട് തോമ

2014 രാജാധിരാജ, റിങ് മാസ്റ്റർ, കസിൻസ്

2016 പുലിമുരുകൻ, സഹസം (തമിഴ്)

2017 രാമലീല

2018 മോഹൻലാൽ, ഒടിയൻ, ചന്ദ്രഗിരി

2019 മധുരരാജ, ഇട്ടിമാണി മെയ്ഡ് ഇൻ ചൈന

2022 നൈറ്റ് ഡ്രൈവ്, പത്തൊമ്പതാം നൂറ്റാണ്ട്

2023 ബാന്ദ്ര, കാഥികൻ

2024 വൺസ് അപ്പോൺ എ ടൈം ഇൻ കൊച്ചി

2025 തുടരും

2026 അതിമനോഹരം, ഒറ്റക്കൊമ്പൻ

(വിവരങ്ങൾക്ക് കടപ്പാട്- ഫെഫ്ക ഡയറക്‌ടേഴ്‌സ് യൂണിയന്റെ ആദരാഞ്ജലികൾ)