കരുത്തൻകൂട്ടുകെട്ട് വീണ്ടും; ഷാജികൈലാസ്- എ.കെ.സാജൻ ടീമിന്റെ 'വരവ്' ജൂലായ് 16 മുതൽ

മലയാള സിനിമയിലെ ശക്തമായ ആക്ഷൻ-ഡ്രാമ ചിത്രങ്ങൾക്ക് പുതിയ ഭാഷയും ഊർജവും നൽകിയ കൂട്ടുകെട്ടാണ് തിരക്കഥാകൃത്ത് എ.കെ. സാജനും സംവിധായകൻ ഷാജി കൈലാസും. ഇരുവരും ചേർന്നപ്പോൾ മലയാള സിനിമയിൽ രൂപപ്പെട്ടത് വെറും വിനോദ ചിത്രങ്ങൾ മാത്രമല്ല, ശക്തമായ സാമൂഹിക-രാഷ്ട്രീയ പശ്ചാത്തലവും തീവ്രമായ മനുഷ്യബന്ധങ്ങളും ചേർന്ന ആക്ഷൻ ത്രില്ലർ അനുഭവങ്ങളാണ്.

ഷാജി കൈലാസിന്റെ ദൃശ്യഭാഷയുടെ കരുത്തും എ.കെ.സാജന്റെ മൂർച്ചയുള്ള തിരക്കഥാ ഘടനയും ഒന്നിച്ചപ്പോൾ പ്രേക്ഷകനെ പിടിച്ചിരുത്തുന്ന, ആവേശവും ചിന്തയും ഒരുപോലെ നൽകുന്ന നിരവധി ചിത്രങ്ങൾ മലയാള സിനിമയ്ക്ക് ലഭിച്ചു. അധികാരം, നീതി, പ്രതികാരം, നിയമത്തിന്റെ ഇരുണ്ട വശങ്ങൾ, മനുഷ്യന്റെ മന:ശാസ്ത്രം എന്നിവയെ ആഴത്തിൽ അവതരിപ്പിക്കുന്ന ചിത്രങ്ങളാണ് ഈ കൂട്ടുകെട്ടിന്റെ പ്രത്യേകത.

ഇവരുടെ ഏറ്റവും ശ്രദ്ധേയമായ ചിത്രങ്ങളിൽ ഒന്നാണ് 'ചിന്താമണി കൊലക്കേസ്'. കോടതി പശ്ചാത്തലത്തിൽ നീതിയും അധികാരവും തമ്മിലുള്ള സംഘർഷം ശക്തമായി അവതരിപ്പിച്ച ഈ ചിത്രം മലയാളത്തിലെ കോടതി-ഡ്രാമ വിഭാഗത്തിന് പുതിയ മാനദണ്ഡങ്ങൾ സൃഷ്ടിച്ചു. കഥാപാത്രങ്ങളുടെ മാനസിക സംഘർഷവും കഥയുടെ തീവ്രതയും പ്രേക്ഷകരെ ആഴത്തിൽ സ്വാധീനിച്ചു.

'റെഡ് ചില്ലീസ്' എന്ന ചിത്രം രാഷ്ട്രീയവും പ്രതികാരവും ചേർന്ന ഒരു ത്രില്ലർ അനുഭവമായിരുന്നു. സാധാരണ മനുഷ്യന്റെ ജീവിതത്തിൽ അധികാരത്തിന്റെ ഇടപെടൽ എങ്ങനെ മാറ്റങ്ങൾ സൃഷ്ടിക്കുന്നു എന്നതിനെ ശക്തമായി അവതരിപ്പിച്ച ഈ ചിത്രം, ഷാജി കൈലാസ്–എ. കെ. സാജൻ കൂട്ടുകെട്ടിന്റെ മറ്റൊരു ശ്രദ്ധേയ സൃഷ്ടിയായി മാറി. 'ദ്രോണ 2010' എന്ന ചിത്രം ഫാന്റസി-ത്രില്ലർ ഘടകങ്ങൾ ചേർന്ന വ്യത്യസ്തമായ പരീക്ഷണമായിരുന്നു. സാധാരണ ആക്ഷൻ ചിത്രങ്ങളിൽ നിന്ന് മാറി ഒരു മിത്തിക്കൽ പശ്ചാത്തലത്തിൽ കഥ പറയാനുള്ള ശ്രമം ഈ ചിത്രത്തെ പ്രത്യേകതയുള്ളതാക്കി. വിജയകരമായ കൂട്ടുകെട്ട്' വരവ് ' എന്ന പുതിയ ചിത്രത്തിലൂടെവീണ്ടും ഒന്നിക്കുകയാണ്.

ഹൈറേഞ്ചിന്റെ പശ്ചാത്തലത്തിൽ ഒരുങ്ങിയ ബിഗ് ബജറ്റ് ചിത്രം തീപ്പൊരി ആക്ഷനും, കൈയടി നേടുന്ന മാസ് ഡയലോഗുകളും, ഹൃദയത്തെ സ്പർശിക്കുന്ന വൈകാരികമുഹൂർത്തങ്ങളും നിറഞ്ഞതാണ്. ഗംഭീര ആക്ഷൻ സീനുകൾക്കൊപ്പം ഉശിരൻ ഡയലോഗുകളുടെ തീപ്പൊരികളാണ് പ്രേക്ഷകരെ കാത്തിരിക്കുന്നത്. വർഷങ്ങൾക്കുശേഷം ഷാജിയും സാജനും ഒന്നിക്കുമ്പോൾ അതിന്റെ ഉൾക്കരുത്ത് മുഴുവനും നിറയും 'വരവി'ൽ.

ഓൾഗാ പ്രൊഡക്ഷൻസിന്റെ ബാനറിൽ നൈസി റെജിയാണ് ചിത്രം നിർമിക്കുന്നത്. എക്സിക്യൂട്ടീവ് പ്രൊഡ്യൂസർമാർ :ജോമി ജോസഫ് പുളിങ്കുന്ന്,രാഹുൽ റെജി. ജോജുവിനൊപ്പം അർജുൻ അശോകൻ, മുരളി ഗോപി, വാണി വിശ്വനാഥ്, സുകന്യ, ദീപക് പറമ്പോൽ, ബാബുരാജ്, അസീസ് നെടുമങ്ങാട്, ബൈജു സന്തോഷ്, അഭിമന്യു തിലകൻ, ബോബി കുര്യൻ, അശ്വിൻ കുമാർ, ശ്രീജിത്ത് രവി, കോട്ടയം രമേശ്, ബാലാജി,ബിജു പപ്പൻ,ചാലി പാല, ഷാജി ഷാഹിദ്, ആൻഡ്രായ് ബ്ലിറ്റസ് നെറ്റ്സോവ്, സാനിയ അയ്യപ്പൻ, വിൻസി അലോഷ്യസ്, വീണ നായർ, മെറ്റിൽഡ പെട്രോവിക് എന്നിങ്ങനെ വലിയൊരു താരനിര തന്നെ ചിത്രത്തിൽ അണിനിരക്കുന്നു.