'അഭിനയസരസ്വതി' ഇനി ഓർമയുടെ അഭ്രപാളിയിൽ

ഇന്ത്യൻ സിനിമയുടെ സുവർണ്ണ കാലഘട്ടത്തിന് തിരശ്ശീല വീഴ്ത്തിക്കൊണ്ടാണ് ഇതിഹാസ നടി ബി. സരോജ ദേവി (87) യാത്രയാകുന്നത്. കന്നഡ സിനിമയുടെ 'അഭിനയ സരസ്വതി'യും തമിഴകത്തിന്റെ 'കന്നഡത്തു പൈങ്കിളി'യുമായിരുന്ന സരോജ ദേവി, വാർദ്ധക്യസഹജമായ അസുഖങ്ങളെ തുടർന്ന് ബെംഗളൂരുവിലെ മല്ലേശ്വരത്തുള്ള വസതിയിൽ വെച്ചാണ് ഓർമ്മയായത്. ഏഴ് പതിറ്റാണ്ട് നീണ്ട കരിയറിൽ 200-ൽ അധികം സിനിമകളിലൂടെ അവർ പ്രേക്ഷകരുടെ ഹൃദയം കവർന്നു.

പോലീസുകാരന്റെ മകൾ താരറാണിയായ കഥ

1938 ജനുവരി 7-ന് ഇന്നത്തെ കർണാടകയിലെ ചന്നപട്ടണയിൽ ഒരു സാധാരണ വൊക്കലിംഗ കുടുംബത്തിലായിരുന്നു സരോജ ദേവിയുടെ ജനനം. രാധാ ദേവി എന്നായിരുന്നു യഥാർത്ഥ പേര്. പോലീസ് ഉദ്യോഗസ്ഥനായിരുന്ന അച്ഛൻ ഭൈരപ്പയാണ് മകളിലെ കലാകാരിയെ തിരിച്ചറിഞ്ഞതും പ്രോത്സാഹിപ്പിച്ചതും. നൃത്തം പഠിക്കാനും സിനിമയിൽ അവസരം തേടാനും മകൾക്ക് പൂർണ്ണ പിന്തുണ നൽകിയത് അദ്ദേഹമായിരുന്നു. നൃത്ത പരിശീലനം കഴിഞ്ഞ് തളർന്നുവരുന്ന മകളുടെ കാലിലെ ചിലങ്ക അഴിച്ചുമാറ്റാനും വീർത്ത പാദങ്ങൾ തടവിക്കൊടുക്കാനും ആ അച്ഛൻ എപ്പോഴും കൂടെയുണ്ടായിരുന്നു. അതേസമയം, അമ്മ രുദ്രമ്മയുടെ കർശനമായ നിർദ്ദേശങ്ങൾ കാരണം സ്ലീവ്‌ലെസ് ബ്ലൗസുകളും നീന്തൽ വസ്ത്രങ്ങളും ജീവിതത്തിൽ ഉടനീളം അവർ സ്ക്രീനിൽ ഒഴിവാക്കി.

17-ാം വയസ്സിൽ തുടക്കം, പിന്നെ തിരിഞ്ഞുനോക്കേണ്ടി വന്നില്ല

1955-ൽ പുറത്തിറങ്ങിയ 'മഹാകവി കാളിദാസ' എന്ന കന്നഡ ചിത്രത്തിലൂടെ 17-ാം വയസ്സിലായിരുന്നു സരോജ ദേവിയുടെ സിനിമാ പ്രവേശം. ഒരു ചെറിയ വേഷമായിരുന്നെങ്കിലും ആ ചിത്രം ദേശീയ അവാർഡ് നേടിയതോടെ സരോജ ദേവിയുടെ ഭാഗ്യം തെളിഞ്ഞു. അവരുടെ സ്വാഭാവികമായ അഭിനയവും ഭാവപ്രകടനങ്ങളും ദക്ഷിണേന്ത്യൻ സിനിമാ ലോകത്തിന്റെ ശ്രദ്ധ പിടിച്ചുപറ്റി.

എം.ജി.ആറിന്റെ ഭാഗ്യനായിക

തമിഴകത്ത് സരോജ ദേവിയുടെ തലവര മാറ്റിക്കുറിച്ചത് സാക്ഷാൽ എം.ജി.ആർ ആയിരുന്നു. അദ്ദേഹത്തിന്റെ സംവിധാനത്തിൽ 1958-ൽ പുറത്തിറങ്ങിയ 'നാടോടി മന്നൻ' എന്ന ചിത്രം ബ്ലോക്ക്ബസ്റ്റർ ആയതോടെ അവർ തമിഴിലെ മുൻനിര നായികയായി. പിന്നീട് എം.ജി.ആർ-സരോജ ദേവി കൂട്ടുകെട്ടിൽ 26 സിനിമകളാണ് പിറന്നത്. 'അൻബേ വാ', 'എങ്ക വീട്ടു പിള്ളൈ', 'പടഗോട്ടി' തുടങ്ങിയ ചിത്രങ്ങളെല്ലാം ഇന്നും ക്ലാസിക്കുകളാണ്. എം.ജി.ആർ സിനിമകളുടെ "ഭാഗ്യചിഹ്നം" എന്നാണ് അവർ അറിയപ്പെട്ടിരുന്നത്.

നാലു ഭാഷകളിലെ താരത്തിളക്കം

തെന്നിന്ത്യൻ ഭാഷകളിലും ഹിന്ദിയിലും ഒരുപോലെ തിളങ്ങിയ അപൂർവ്വം നടിമാരിൽ ഒരാളായിരുന്നു സരോജ ദേവി.

കന്നഡ- 'കിറ്റൂർ ചെന്നമ്മ'യിലെ രാജ്ഞിയുടെ വേഷം ഏറെ പ്രശംസിക്കപ്പെട്ടു. ഡോ. രാജ്‌കുമാറിനൊപ്പം 'ബബ്രുവാഹന', 'ഭാഗ്യവന്തരു' തുടങ്ങിയ നിരവധി ഹിറ്റുകളിൽ അഭിനയിച്ചു. കന്നഡയിലെ ആദ്യ കളർ ചിത്രമായ 'അമരശിൽപി ജകനാചാരി'യിലെ നായികയും അവരായിരുന്നു.

തമിഴ്- എം.ജി.ആറിന് പുറമെ, ശിവാജി ഗണേശനൊപ്പം 'പാപ്പിയർ പാറു', 'പാപ പാവം' തുടങ്ങിയ 22 ചിത്രങ്ങളിലും അഭിനയിച്ചു.

തെലുങ്ക്- എൻ.ടി. രാമറാവു, അക്കിനേനി നാഗേശ്വര റാവു തുടങ്ങിയ ഇതിഹാസ താരങ്ങളുടെയെല്ലാം നായികയായി തെലുങ്കിലും അവർ തരംഗം സൃഷ്ടിച്ചു. 'സീതാരാമ കല്യാണം', 'ജഗദേക വീരുണി കഥ' എന്നിവ പ്രധാന ചിത്രങ്ങളാണ്.

ഹിന്ദി- ദിലീപ് കുമാറിന്റെ 'പൈഗാം' എന്ന ചിത്രത്തിലൂടെ ബോളിവുഡിലും അരങ്ങേറ്റം കുറിച്ചു. സുനിൽ ദത്ത്, രാജേന്ദ്ര കുമാർ, ഷമ്മി കപൂർ തുടങ്ങിയ മുൻനിര താരങ്ങൾക്കൊപ്പവും അഭിനയിച്ചു.

തുടർച്ചയായി 29 വർഷം കൊണ്ട് 161 സിനിമകളിൽ നായികയായി അഭിനയിച്ച ഒരേയൊരു ഇന്ത്യൻ നടി എന്ന റെക്കോർഡും സരോജ ദേവിയുടെ പേരിലാണ്.

പുരസ്കാരങ്ങൾ തേടിയെത്തിയപ്പോൾ

ഇന്ത്യൻ സിനിമയ്ക്ക് നൽകിയ സംഭാവനകൾ പരി​ഗണിച്ച് രാജ്യം അവരെ പത്മശ്രീ (1969), പത്മഭൂഷൺ (1992) എന്നിവ നൽകി ആദരിച്ചു. ഫിലിംഫെയർ ലൈഫ് ടൈം അച്ചീവ്മെന്റ് അവാർഡ്, കലൈമാമണി, ഡോ. രാജ്‌കുമാർ ലൈഫ് ടൈം അച്ചീവ്മെന്റ് അവാർഡ് എന്നിവയുൾപ്പെടെ നിരവധി ബഹുമതികളും തേടിയെത്തി.

ഒരു കാലഘട്ടത്തിന്റെ ഫാഷൻ ഐക്കൺ

സരോജ ദേവി ഒരു നടി മാത്രമല്ല, 1960-കളിലെ ഒരു ഫാഷൻ ഐക്കൺ കൂടിയായിരുന്നു. 'അൻബേ വാ', 'എങ്ക വീട്ടു പിള്ളൈ' തുടങ്ങിയ സിനിമകളിലെ അവരുടെ സാരികളും ആഭരണങ്ങളും ഹെയർസ്റ്റൈലുകളും അക്കാലത്തെ സ്ത്രീകകൾക്കിടയിൽ വലിയ ട്രെൻഡായി മാറി. മാസികകൾ അവരുടെ സ്റ്റൈൽ അനുകരിക്കാൻ ആഹ്വാനം ചെയ്തു.

സ്വകാര്യ ജീവിതവും അവസാന നാളുകളും

1967-ൽ ശ്രീ ഹർഷയെ വിവാഹം കഴിച്ചു. വിവാഹശേഷം തമിഴ് സിനിമയിൽ നിന്ന് പതിയെ പിൻവാങ്ങിയെങ്കിലും കന്നഡ, തെലുങ്ക് സിനിമകളിൽ സജീവമായി തുടർന്നു. ഭർത്താവിന്റെ മരണശേഷം സിനിമയിൽ നിന്ന് ഇടവേളയെടുത്ത അവർ പിന്നീട് ചുരുക്കം ചില ചിത്രങ്ങളിൽ മാത്രമാണ് അഭിനയിച്ചത്. 2009-ൽ സൂര്യ നായകനായ 'ആധവൻ' ആയിരുന്നു അവസാനമായി അഭിനയിച്ച പ്രധാന ചിത്രം.

ബി.സരോജ ദേവിയുടെ വിയോഗം ഇന്ത്യൻ സിനിമയിലെ ഒരു യുഗത്തിന്റെ അന്ത്യമാണ്. കഴിവുകൊണ്ടും കഠിനാധ്വാനം കൊണ്ടും സിനിമാ ലോകത്ത് തന്റേതായ സിംഹാസനം പണിത ആ ഇതിഹാസ നായിക തലമുറകൾക്ക് പ്രചോദനമായി എന്നും ഓർമ്മിക്കപ്പെടും.