മറാത്തി ചിത്രം 'ഗോന്ധൽ' ഇന്ത്യയുടെ 2027-ലെ ഓസ്കർ എൻട്രി

സന്തോഷ് ദാവഖർ രചനയും സംവിധാനവും നിർവ്വഹിച്ച 'ഗോന്ധൽ' (2025) എന്ന മറാത്തി ത്രില്ലർ ചിത്രം, 99-ാമത് ഓസ്കർ അവാർഡിലേക്കുള്ള ഇന്ത്യയുടെ ഔദ്യോഗിക എൻട്രിയായി തിരഞ്ഞെടുക്കപ്പെട്ടു. 2027-ലെ അവാർഡുകളിൽ മികച്ച അന്താരാഷ്ട്ര ഫീച്ചർ ഫിലിം വിഭാഗത്തിലേക്കാണ് ചിത്രം മത്സരിക്കുക. ഇന്ത്യയുടെ ഓസ്‌കർ എൻട്രിയായി തിരഞ്ഞെടുക്കപ്പെടുന്ന നാലാമത്തെ മറാത്തി ചിത്രമാണിത്.

ഗ്രാമീണ മഹാരാഷ്ട്രയുടെ പശ്ചാത്തലത്തിൽ ഒരു രാത്രി മുഴുവൻ നീണ്ടുനിൽക്കുന്ന കഥയാണ് 'ഗോന്ധൽ' പറയുന്നത്. സംഗീതവും നൃത്തവും ഐതിഹ്യങ്ങളും സമന്വയിക്കുന്ന, അർദ്ധരാത്രിയിലെ പരമ്പരാഗത അനുഷ്ഠാനമായ 'ഗോന്ധൽ' പ്രകടനത്തിന്റെ പശ്ചാത്തലത്തിലാണ് ഈ സൈക്കോളജിക്കൽ ത്രില്ലർ വികസിക്കുന്നത്.

സമ്പന്നനായ ആനന്ദ് എന്ന വ്യക്തിയുമായുള്ള അടിച്ചമർത്തപ്പെട്ടതും അതൃപ്തി നിറഞ്ഞതുമായ ദാമ്പത്യജീവിതത്തിൽ കുടുങ്ങിക്കിടക്കുന്ന സുമൻ എന്ന യുവവധുവിനെ കേന്ദ്രീകരിച്ചാണ് കഥ മുന്നോട്ട് പോകുന്നത്. പരമ്പരാഗത 'ഗോന്ധൽ' കലാകാരനായ സാഹെബയുമായി അവൾ പ്രണയത്തിലാവുകയും, ദാമ്പത്യജീവിതത്തിൽ നിന്ന് രക്ഷപ്പെടാനായി കാമുകന്റെ ബന്ധുവായ സർജേറാവുവിനെ കരുവാക്കി കൊലപാതകം നടത്തുകയും ചെയ്യുന്നു.

സുമൻ ആയി ഇഷിത ദേശ്മുഖാണ് അഭിനയിക്കുന്നത്. യോഗേഷ് സോഹോനി, കിഷോർ കദം, സുരേഷ് വിശ്വകർമ്മ, നിഷാദ് ഭോയിർ, അനുജ് പ്രഭു തുടങ്ങിയവരാണ് മറ്റ് അഭിനേതാക്കൾ. തിയേറ്ററുകളിൽ വലിയ വിജയം നേടാനാകാതെ പോയ ചിത്രം ഓസ്കർ എൻട്രിയായി തിരഞ്ഞെടുക്കപ്പെട്ടതോടെ പ്രേക്ഷകശ്രദ്ധയാകർഷിച്ചിരിക്കുകയാണ്. ചിത്രം ഒടിടിയിൽ ലഭ്യമാണോ എന്ന അന്വേഷണത്തിലാണ് പലരും. പക്ഷേ 'ഗോന്ധൽ' ഇതുവരെ ഒടിടിയിൽ റിലീസ് ചെയ്തിട്ടില്ല.