'എന്റെ മകൻ ഈ ചിത്രങ്ങൾ ഒരുദിവസം കാണും,അതെന്നെ ഭയപ്പെടുത്തുന്നു'

'ദി വുമണ്‍ ഇന്‍ ദി ബ്ലൂ സാരി' എന്ന പേരില്‍, മോര്‍ഫ് ചെയ്ത തന്റെ അശ്ലീല ചിത്രങ്ങള്‍ വൈറലായതിനെത്തുടര്‍ന്ന് പ്രതികരണവുമായി ബോളിവുഡ് നടി ഗിരിജ ഓക്ക്. ഗുല്‍ഷന്‍ ദേവയ്യയ്ക്കൊപ്പം റിലീസിനൊരുങ്ങുന്ന 'തെറാപ്പി ഷെറാപ്പി' എന്ന വെബ് സീരീസിനായി തയാറെടുക്കുന്ന താരം വീഡിയോ സന്ദേശത്തിലൂടെയാണ് ശക്തമായ പ്രതികരണം നടത്തിയത്. മോര്‍ഫ് ചെയ്ത ചിത്രങ്ങളാണ് പ്രചരിക്കുന്നതെന്നും ഇത്തരത്തിലുള്ള അശ്ലീല ചിത്രങ്ങള്‍ പ്രചരിപ്പിക്കുന്നവര്‍ തനിക്ക് പന്ത്രണ്ട് വയസുള്ള മകനുണ്ടെന്ന് ഓര്‍ക്കണമെന്നും താരം പറയുന്നു.

'തെറാപ്പി ഷെറാപ്പി'യുടെ പ്രചരണാർഥം ഒരു ഓൺലൈൻ ചാനലിന് നല്കിയ അഭിമുഖത്തോടെയാണ്​ ​ഗിരിജ ശ്രദ്ധാകേന്ദ്രമായി മാറിയത്. വെബ്സീരിസിൽ ഇന്റിമേറ്റ് രം​ഗങ്ങൾ ചിത്രീകരിച്ചതിനെക്കുറിച്ചും അതിൽ സഹതാരം ​ഗുൽഷൻ ദേവയ്യ പുലർത്തിയ ജാ​ഗ്രതയെക്കുറിച്ചും ​ഗിരിജ തുറന്നുപറഞ്ഞിരുന്നു. ഇതോടെ അഭിമുഖത്തിൽനിന്നുള്ള ​ഗിരിജയുടെ ദൃശ്യങ്ങളുടെ സ്ക്രീൻഷോട്ടുകൾ എക്സിൽ നിറഞ്ഞു. അവരുടെ സോഷ്യൽമീഡിയ അക്കൗണ്ടുകളിൽ നിന്നുള്ള ചിത്രങ്ങളും വ്യപകമായി പ്രചരിച്ചു. ആരാണ് ​ഗിരിജാ ഓക്ക് എന്ന തിരച്ചിലിലായി തുടർന്ന് സൈബർ ലോകം. ഇതിനൊപ്പമാണ് 'ദി വുമണ്‍ ഇന്‍ ദി ബ്ലൂ സാരി' എന്ന പേരില്‍ എന്ന പേരിൽ ​ഗിരിജയുടെ മോർഫ് ചെയ്ത ചിത്രങ്ങളും പ്രത്യക്ഷപ്പെട്ടത്.

'ദിവസങ്ങളായി സോഷ്യല്‍ മീഡിയയില്‍ സംഭവിച്ചുകൊണ്ടിരിക്കുന്നത് തികഞ്ഞ ഭ്രാന്താണ്...' ഗിരിജ പറഞ്ഞു. ആരാധകരില്‍നിന്നും സുഹൃത്തുക്കളില്‍നിന്നും ഒഴുകിയെത്തിയ സ്‌നേഹത്തിന് അവര്‍ നന്ദിയും പറഞ്ഞു. 'എനിക്ക് ഒരുപാട് സ്‌നേഹം ലഭിക്കുന്നുണ്ട്. ഇന്‍സ്റ്റഗ്രാമിലോ മറ്റ് സോഷ്യല്‍ മീഡിയ പ്ലാറ്റ്ഫോമുകളിലോ എന്റെ പോസ്റ്റുകള്‍ കണ്ട ആളുകളില്‍നിന്ന് ധാരാളം മനോഹരമായ കമന്റുകള്‍, സന്ദേശങ്ങള്‍, ഫോണ്‍ കോളുകള്‍ ലഭിക്കാറുണ്ട്. എനിക്ക് ലഭിക്കുന്ന സ്‌നേഹത്തിന്റെ അളവ് വളരെ വലുതാണ്...' താരം പറഞ്ഞു.

ഇതിനൊപ്പം തന്റേതായി പ്രചരിക്കുന്ന അശ്ലീല ചിത്രങ്ങള്‍ തന്നെ വേദനിപ്പിച്ചെന്നും താരം തുറന്നുപറഞ്ഞു. 'എനിക്ക് പന്ത്രണ്ട് വയസുള്ള മകനുണ്ട്. അവന്‍ ഇപ്പോള്‍ സോഷ്യല്‍ മീഡിയ ഉപയോഗിക്കാറില്ല, പക്ഷേ വൈകാതെ ഉപയോഗിക്കും. അവന്‍ വളരുമ്പോള്‍, ഈ ചിത്രങ്ങള്‍ അവന് ലഭ്യമാകും, കാരണം അപ്പോഴും ചിത്രങ്ങള്‍ പ്രചരിക്കുന്നുണ്ടാകാം. എന്നെന്നേക്കുമായി ചിത്രങ്ങള്‍ ഇന്റര്‍നെറ്റില്‍ നിലനില്‍ക്കും. അവന്റെ അമ്മയുടെ അശ്ലീല ചിത്രങ്ങള്‍, അവന്‍ ഒരു ദിവസം കാണാനിടയാകും. ചിത്രങ്ങള്‍ വ്യാജമാണെങ്കിലും അത് എന്നെ വിഷമിപ്പിക്കുന്നു. എന്നെ ഭയപ്പെടുത്തുന്നു. അവയെക്കുറിച്ച് അവന്‍ എങ്ങനെ ചിന്തിക്കുമെന്നത് എന്നെ അലട്ടുന്നു. എന്നാല്‍, അവ യഥാര്‍ഥ ചിത്രങ്ങളല്ലെന്നും എഐയുടെ സഹായത്തോടെ നിര്‍മിച്ചതാണെന്നും അവനു മനസിലാകും...' ഗിരിജ പറഞ്ഞു.

മറാത്തി നാടക-സിനിമാമേഖലയില്‍ പ്രശസ്തയായ ഗിരിജ ഓക്ക്, താരേ സമീന്‍ പര്‍, ലേഡീസ് സ്പെഷ്യല്‍, ജവാന്‍, ഇന്‍സ്പെക്ടര്‍ സെന്‍ഡെ തുടങ്ങിയ ഹിന്ദി ചിത്രങ്ങളിലൂടെയും വ്യക്തിമുദ്ര പതിപ്പിച്ചിട്ടുണ്ട്. പക്ഷേ തെറാപ്പി ഷെറാപ്പിയെന്ന പുതിയ വെബ്സീരീസാണ് അവരെ ലോകംമുഴുവൻ ശ്രദ്ധാകേന്ദ്രമാക്കിയത്.