‘ബാഹുബലി’യിലെ ശിവഗാമിയെ ഓർമയില്ലേ? അതേ പോലൊരു കഥാപാത്രത്തിലൂടെ പ്രേക്ഷകരെ വീണ്ടും അമ്പരപ്പിക്കാനൊരുങ്ങുകയാണ് രമ്യ കൃഷ്ണൻ. മഞ്ചു മനോജ് നായകനാകുന്ന ബിഗ് ബജറ്റ് പിരീഡ് ആക്ഷൻ ഡ്രാമ 'ഡേവിഡ് റെഡ്ഡി'യിലാണ് ഈ വേഷപ്പകർച്ച. ചിത്രത്തിലെ രമ്യാ കൃഷ്ണന്റെ ക്യാരക്ടർ പോസ്റ്റർ പുറത്തുവിട്ടു. താരത്തിന്റെ പിറന്നാളിനോടനുബന്ധിച്ചാണ് കമല റെഡ്ഡി എന്ന ശക്തമായ കഥാപാത്രത്തിന്റെ ലുക്ക് അണിയറപ്രവർത്തകർ സമ്മാനമായി പുറത്തിറക്കിയത്.
ഒരു രാജസിംഹാസനത്തിൽ വാളുമേന്തി ഗൗരവത്തോടെ ഇരിക്കുന്ന വന്യവും കരുത്തുറ്റതുമായ ലുക്കിലാണ് രമ്യാ കൃഷ്ണൻ പോസ്റ്ററിലുള്ളത്. 'ബാഹുബലി'യിലെ ശിവകാമി എന്ന കഥാപാത്രത്തിന് ശേഷം രമ്യാ കൃഷ്ണന്റെ കരിയറിലെ മറ്റൊരു നാഴികക്കല്ലാവും 'ഡേവിഡ് റെഡ്ഡി'യിലെ കമലാ റെഡ്ഡിയെന്നാണ് പോസ്റ്റർ നല്കുന്ന സൂചന. സിനിമയുടെ കഥാഗതിയിൽ ഏറെ നിർണായകമായ വേഷമാണ് താരം കൈകാര്യം ചെയ്യുന്നത്.
നവാഗതനായ ഹനുമ റെഡ്ഡി യക്കന്തി സംവിധാനം ചെയ്യുന്ന ചിത്രം സ്വാതന്ത്ര്യത്തിന് മുമ്പുള്ള ബ്രിട്ടീഷ് കാലഘട്ടത്തിന്റെ പശ്ചാത്തലത്തിലാണ് ഒരുങ്ങുന്നത്. മഞ്ചു മനോജിന്റെ വേറിട്ട റസ്റ്റിക് ലുക്കും ചിത്രത്തിന്റെ വലിയ ആകർഷണമാണ്. ചിത്രത്തിന്റെ ടീസറിൽ കലാപകാരിയായ കഥാപാത്രമായുള്ള മഞ്ചു മനോജിന്റെ വമ്പൻ രൂപപരിണാമം പ്രേക്ഷകരെ ഞെട്ടിച്ചിരുന്നു. ഇപ്പോൾ രമ്യ കൃഷ്ണന്റെ പിറന്നാൾ പോസ്റ്റർ കൂടി എത്തിയതോടെ ചിത്രത്തിലെ കഥാപാത്രങ്ങളെക്കുറിച്ചുള്ള ആകാംക്ഷ വർധിച്ചിരിക്കുകയാണ്.
മരിയ റ്യാബോഷാപ്ക നായികയാകുന്ന ചിത്രത്തിൽ സമുദ്രക്കനി,അഭയ് ഡിയോൾ, കാഞ്ചന എന്നിവരും പ്രധാന വേഷങ്ങളിലെത്തുന്നു.
വെങ്കട്ട് റെഡ്ഡി നല്ലഗംഗുലയും ഭാരത് മോട്ടുകുറിയും ചേർന്നാണ് ചിത്രം നിർമിക്കുന്നത്. രവി ബസ്രൂർ സംഗീതമൊരുക്കുന്നു. തെലുങ്ക്, തമിഴ്, മലയാളം, കന്നഡ, ഹിന്ദി എന്നീ അഞ്ച് ഭാഷകളിലായാണു ചിത്രം ഒരുങ്ങുന്നത്.