'ബാഹുബലി ദി എപ്പിക്' പോസ്റ്റർ അറേഞ്ച്ഡ്
Telugu

അമേരിക്കയിലും കാനഡയിലും റെക്കോഡിട്ട് 'ബാഹുബലി ദി എപ്പിക്'

പപ്പപ്പ റിപ്പോര്‍ട്ടര്‍

'ബാഹുബലി- ദി എപ്പിക്' അമേരിക്കയിലും കാനഡയിലും നേടിയത് റെക്കോഡ് കളക്ഷൻ. പ്രഭാസ്, റാണ ദഗുബതി, അനുഷ്‌ക ഷെട്ടി, സത്യരാജ്, രമ്യ കൃഷ്ണന്‍ എന്നിവര്‍ പ്രധാന കഥാപാത്രങ്ങളായ ഈ രാജമൗലി മാഗ്‌നം ഓപസ് വലിയ ആവേശമാണു സൃഷ്ടിച്ചത്. ബോക്‌സ് ഓഫീസിലെ റെക്കോഡ് നേട്ടം, 'ബാഹുബലി' നിത്യഹരിതമാണെന്നും പ്രേക്ഷകര്‍ ഇപ്പോഴും ബിഗ് സ്‌ക്രീനില്‍ ചിത്രം കാണാന്‍ ആഗ്രഹിക്കുന്നതിന്റെ തെളിവായിരുന്നു. ബാഹുബലിയുടെ രണ്ടു ഭാഗങ്ങളും ചേര്‍ത്താണ് 'ബാഹുബലി- ദി എപ്പിക്' എന്ന പേരിൽ റിലീസ് ചെയ്തത്.

ബാഹുബലി, ബാഹുബലി 2 എന്നീ രണ്ട് സിനിമകള്‍ സംയോജിപ്പിച്ച് ഒറ്റ സിനിമയാക്കി മാറ്റിയത് ഇന്ത്യന്‍ സിനിമയിലെ ആദ്യത്തെ, സവിശേഷമായ പുനര്‍-റിലീസ് രീതിയായിരുന്നു. കൂടാതെ, ഇതുവരെ കാണാത്ത സീനുകളും ഉള്‍പ്പെടുത്തി. വെങ്കി ബോക്‌സ് ഓഫീസിന്റെ കണക്കനുസരിച്ച്, 'ബാഹുബലി-ദി എപ്പിക്' വടക്കേ അമേരിക്കന്‍ ബോക്‌സ് ഓഫീസില്‍ 8.26 കോടി രൂപ നേടി. മേഖലയില്‍ ഇന്ത്യന്‍ റീ-റിലീസ് ചിത്രത്തിനു ലഭിക്കുന്ന എക്കാലത്തെയും റെക്കോര്‍ഡ് കളക്ഷനാണിത്. അമേരിക്കയില്‍നിന്നാണ് കൂടുതല്‍ കളക്ഷന്‍ നേടിയത്. ഇന്ത്യയില്‍ 'ബാഹുബലി- ദി എപ്പിക്' ബോക്‌സ് ഓഫീസ് കുതിപ്പ് ഏതാണ്ട് അവസാനിച്ചു. ഏറ്റവും പുതിയ വിവരങ്ങള്‍ പ്രകാരം, 20 ദിവസത്തിനുള്ളില്‍ 33.48 കോടിയിലേറെ രൂപയുടെ വരുമാനം നേടിയിട്ടുണ്ട്. ജിഎസ്ടി കണക്കുകള്‍ പ്രകാരം, മൊത്തം കളക്ഷന്‍ 39.5 കോടി രൂപയാണ് (നേരിയ വ്യത്യാസങ്ങള്‍ വരാം).