നവംബർ രണ്ടാംവാരം വിവിധ ഭാഷകളിൽനിന്നായി നിരവധി ബിഗ് ബജറ്റ് ചിത്രങ്ങളാണ് തിയേറ്ററുകളിലേക്ക് എത്തുന്നത്. ധനുഷ്-മമ്മൂട്ടി കൂട്ടുകെട്ടിലെ ‘ഒ.എം’ ആണ് ഇതിൽ പ്രധാനം. ‘ഗോഡ്സില്ല മൈനസ് സീറോ’ ‘ബാച്ചിലർ പാർട്ടി ദ്യു’ തുടങ്ങിയ ചിത്രങ്ങളും തിയേറ്ററുകളിലെ പ്രധാന ആകർഷണങ്ങളാണ്.
ഒ.എം
രാജ്കുമാർ പെരിയസാമി സംവിധാനം ചെയ്യുന്ന ചിത്രം. തിരുവണ്ണാമലൈ വനമേഖലയിലെ രക്തചന്ദനക്കടത്തും തമിഴ് വിറകുവെട്ടുകാരുടെ അറസ്റ്റുമായി ബന്ധപ്പെട്ട യഥാർഥ സംഭവങ്ങളും ആസ്പദമാക്കിയാണ് കഥ. സിബിഐയും ഇന്റർപോളും ഉൾപ്പെടുന്ന രഹസ്യ ഓപ്പറേഷനാണ് ഇതിവൃത്തം. ധനുഷ്, മമ്മൂട്ടി, സായ് പല്ലവി, ശ്രീലീല, നസറുദിൻ ഷാ, ഇന്ദ്രൻസ്, ചൈതു ജോന്നലഗദ്ദ എന്നിവർ അണിനിരക്കുന്നു. നവംബർ 20ന് തിയേറ്ററുകളിൽ.
ബാച്ചിലർ പാർട്ടി ദ്യു
അമൽ നീരദ് സംവിധാനം ചെയ്ത ആക്ഷൻ ഡ്രാമ ചിത്രം. 2012-ൽ പുറത്തിറങ്ങിയ ‘ബാച്ചിലർ പാർട്ടി’യുടെ സ്പിരിച്വൽ സക്സസറായി എത്തുന്ന ചിത്രത്തിൽ നസ്ലെൻ, ടൊവിനോ തോമസ്, കുഞ്ചാക്കോ ബോബൻ, സൗബിൻ ഷാഹിർ, ശ്രീനാഥ് ഭാസി, ഷറഫുദിൻ, ഹൻസിക കൃഷ്ണ, ചന്തു സലിംകുമാർ എന്നിവർ പ്രധാന വേഷങ്ങളിൽ അഭിനയിക്കുന്നു. നഗരത്തിലെ അരാജകത്വത്തിനിടയിൽ ഒരു കൂട്ടം കള്ളന്മാരുടെ അപകടകരമായ രക്ഷപ്പെടലാണ് പ്രമേയം. ചിത്രം വ്യാഴാഴ്ച തിയേറ്ററുകളിലെത്തി.
അപ്പ കുട്ടി
മാരൻ സംവിധാനം ചെയ്യുന്ന ചിത്രത്തിൽ വിജയ് ആന്റണി പ്രധാന വേഷത്തിൽ എത്തുന്നു. മകളെ സംരക്ഷിക്കാനായി പ്രതിസന്ധികളെ നേരിടുന്ന ഒരു പിതാവിന്റെ കഥയാണ് പറയുന്നത്. ബേബി ലിതാന്യ, പ്രീതി അസ്രാനി, ഭഗവതി പെരുമാൾ എന്നിവരും ചിത്രത്തിലുണ്ട്. തമിഴ്ചിത്രം നവംബർ 20ന് തിയേറ്ററുകളിൽ.
സത്യവാൻ സാവിത്രി
പ്രവീൺ എസ്. വിജയ് സംവിധാനം ചെയ്യുന്ന ചിത്രത്തിൽ കീർത്തി സുരേഷ് പ്രധാന കഥാപാത്രത്തെ അവതരിപ്പിക്കുന്നു. നിർബന്ധിത വിവാഹത്തിന് വിധേയയാകുന്ന അഭിഭാഷക സാവിത്രി, ഭർത്താവ് ഒരു കൊലക്കേസിൽ പ്രതിയാകുമ്പോൾ അയാളെ പ്രതിരോധിക്കാൻ കോടതിയിൽ തന്റെ സീനിയർ അഭിഭാഷകനായ മാർക്കണ്ഡേയനെ നേരിടേണ്ടി വരുന്നതാണ് കഥ. മിഷ്കിൻ, ചരുകേശ്, ബാല ശരവണൻ എന്നിവരും പ്രധാന വേഷങ്ങളിലുണ്ട്. കോളിവുഡ് ചിത്രം നവംബർ 20ന് തിയേറ്ററുകളിൽ.
ഗോഡ്സില്ല മൈനസ് സീറോ
തകാഷി യമസാക്കി സംവിധാനം ചെയ്യുന്ന ചിത്രം യുദ്ധാനന്തര ജപ്പാൻ, പുനർനിർമണ ഘട്ടത്തിലിരിക്കെ ഗോഡ്സില്ല വീണ്ടും ഉയർത്തുന്ന ഭീഷണിയെയാണ് അവതരിപ്പിക്കുന്നത്. റ്യുനോസുകെ കാമിക്കി, മിനാമി ഹമാബെ എന്നിവർ പ്രധാന കഥാപാത്രങ്ങളായി എത്തുന്നു. നവംബർ 20ന് തിയേറ്ററുകളിൽ.
പാർട്ടി അനിമൽസ്
രവി ഛബ്രിയ സംവിധാനം ചെയ്യുന്ന ബോളിവുഡ് കോമഡി ചിത്രത്തിൽ വിരാജ് ഘെലാനി, അർജുൻ തൻവാർ എന്നിവർ പ്രധാന വേഷങ്ങളിൽ എത്തുന്നു. നവംബർ 20ന് തിയേറ്ററുകളിൽ.
കാളി ഖേതി
ഹാരിസ് ഇംതിയാസ് ഖാൻ സംവിധാനം ചെയ്യുന്ന ഹിന്ദി ഹൊറർ ചിത്രത്തിൽ ജാക്കി ഷ്രോഫ്, ശരദ് കേൽക്കർ, നേഹ സർഗം എന്നിവർ അഭിനയിക്കുന്നു. നവംബർ 20ന് തിയേറ്ററുകളിൽ റിലീസ് ചെയ്യും.