തെന്നിന്ത്യന്‍ സൂപ്പര്‍ സ്റ്റാര്‍ ധനുഷിന്റെ മാനേജര്‍ കാസ്റ്റിങ് കൗച്ച് നടത്തിയെന്ന് ആരോപിച്ച ടിവി അവതാരകയും നടിയുമായ മന്യ ആനന്ദ് വിശദീകരണവുമായി രംഗത്ത്. ധനുഷിന്റെ മാനേജര്‍ ശ്രേയസ് കാസ്റ്റിങ് കൗച്ച് നടത്തിയെന്നാരോപിച്ച് നേരത്തെ മന്യ വീഡിയോ പങ്കുവച്ചിരുന്നു. ഈ വീഡിയോ സമൂഹമാധ്യമങ്ങളില്‍ വൈറലായതിനെത്തുടര്‍ന്ന് ഇപ്പോൾ സംഭവത്തില്‍ വിശദമായ വീഡിയോ ഇന്‍സ്റ്റഗ്രാമില്‍ പങ്കുവച്ചിരിക്കുകയാണ് അവർ.
അടുത്തിടെ, അഭിമുഖത്തിലാണ് താന്‍ കാസ്റ്റിങ് കൗച്ചിന് ഇരയായിട്ടുണ്ടെന്ന് മന്യ ആനന്ദ് തുറന്നുപറഞ്ഞത്. ശ്രേയസ് എന്ന് അവകാശപ്പെടുന്ന ഒരാള്‍ ധനുഷിന്റെ ചിത്രത്തില്‍ മികച്ച വേഷം വാഗ്ദാനം ചെയ്തതിനുശേഷം 'വഴങ്ങാന്‍' ആവശ്യപ്പെടുകയായിരുന്നു. എന്നാല്‍ വീഡിയോ പുറത്തുവന്നതിനുശേഷം 'തെറ്റായ വിവരങ്ങള്‍' പ്രചരിപ്പിക്കുന്നതിനായി ധനുഷിന്റെ പേര് ദുരുപയോഗം ചെയ്തതായി പലരും ആരോപിച്ചു. മന്യയുടെ പോസ്റ്റിന് ശേഷം ശ്രേയസും ഒരു പ്രസ്താവന പുറത്തിറക്കി. ഇക്കാര്യത്തില്‍ ഔദ്യോഗിക പരാതി നല്‍കിയതായും അറിയിച്ചു.
'ശ്രേയസ് എന്നൊരാള്‍ ധനുഷ് സാറിന്റെ സിനിമയെക്കുറിച്ച് സംസാരിക്കാന്‍ എന്നെ വിളിച്ചു. ഇത് വ്യാജമാണോ സത്യമാണോ എന്ന് എനിക്കറിയില്ലെന്ന് ഞാന്‍ വളരെ വ്യക്തമായി പറഞ്ഞു. ചില വ്യാജ വ്യക്തികളുണ്ടായിരിക്കാമെന്നും ഞാന്‍ പ്രസ്താവിച്ചു. അവര്‍ വ്യാജമാണോ അല്ലയോ എന്ന് എനിക്കറിയില്ല...' മന്യ പറഞ്ഞു.
'ഞാന്‍ നല്‍കിയ ഫൂട്ടേജ് ഒരു ബോധവത്കരണ വീഡിയോ ആയിരുന്നു. പക്ഷേ ഇപ്പോള്‍ അത് ദുരുപയോഗം ചെയ്യപ്പെടുന്നു. ബോധവത്കരണ വീഡിയോ ഒരു ആരോപണ വീഡിയോയായി മാറി. മറ്റുള്ളവരെ അപകീര്‍ത്തിപ്പെടുത്താന്‍ ആളുകള്‍ എന്റെ പേര് ഉപയോഗിക്കുന്നതില്‍ എനിക്ക് നിരാശയുണ്ട്. യൂട്യൂബ് ചാനലുകള്‍ അവരുടെ ഹിറ്റ് വര്‍ധിപ്പിക്കുന്നതിനായി വീഡിയോ വ്യാജമായി എഡിറ്റ് ചെയ്യുന്നു...' മന്യ കൂട്ടിച്ചേര്‍ത്തു.