സൂപ്പർസ്റ്റാർ രജനികാന്തിന്‍റെ കരിയറിലെ ഏറ്റവും പുതിയ വിജയചിത്രമായ 'ജയിലർ 2' ബോക്സ് ഓഫീസിൽ കുതിപ്പ് തുടരുന്നു. റിലീസ് ചെയ്ത് ആറാം ദിവസം പിന്നിടുമ്പോൾ ചിത്രം ലോകമെമ്പാടുമായി 540 കോടി രൂപയിലധികം കളക്ഷൻ നേടി വലിയൊരു നാഴികക്കല്ല് പിന്നിട്ടു. നെൽസൺ ദിലീപ്കുമാർ സംവിധാനം ചെയ്ത ചിത്രം ബോക്സ് ഓഫീസിൽ പുതിയ റെക്കോഡുകൾ സൃഷ്ടിച്ചുകൊണ്ടിരിക്കുകയാണ്.
ആറാം ദിവസമായ ചൊവ്വാഴ്ച ചിത്രം ഇന്ത്യയിൽ നിന്ന് മാത്രം 54.70 കോടി രൂപയുടെ ഗ്രോസ് കളക്ഷൻ നേടി. തിങ്കളാഴ്ചത്തെ കളക്ഷനുമായി താരതമ്യം ചെയ്യുമ്പോൾ 10.5 ശതമാനത്തിന്‍റെ വർധനവാണ് ചൊവ്വാഴ്ച രേഖപ്പെടുത്തിയത്. ഇതിലൂടെ ചിത്രത്തിന്‍റെ ആകെ ആഭ്യന്തര ഗ്രോസ് കളക്ഷൻ 338.45 കോടി രൂപയായും, വിദേശ രാജ്യങ്ങളിലെ കളക്ഷൻ 204 കോടി രൂപയായും ഉയർന്നു.
രജനികാന്തിന്‍റെ മുൻചിത്രങ്ങളായ 'ജയിലർ', 'കൂലി' എന്നിവയുടെ ആറാം ദിവസത്തെ കളക്ഷൻ റെക്കോഡുകളെയാണ് 'ജയിലർ 2' തകർത്തെറിഞ്ഞിരിക്കുന്നത്. ടൈഗർ മുത്തുവേൽ പാണ്ഡ്യനായി രജനികാന്ത് വീണ്ടും എത്തിയപ്പോൾ ബോക്സ്ഓഫീസ് ഇളകിമറിയുകയാണ്. മോഹൻലാൽ, ശിവരാജ്കുമാർ, വിദ്യാ ബാലൻ, ഹൃതിക് റോഷൻ, വിജയ് സേതുപതി തുടങ്ങി നിരവധി പ്രമുഖരും ചിത്രത്തിൽ അണിനിരക്കുന്നുണ്ട്. സൺ പിക്ചേഴ്സിന്‍റെ ബാനറിൽ കലാനിധി മാരൻ നിർമിച്ച ചിത്രത്തിന് സംഗീതം നൽകിയിരിക്കുന്നത് അനിരുദ്ധ് രവിചന്ദർ ആണ്.