മകൻ ജഗന്റെ പിറന്നാൾ ദിനത്തിലെ ആശംസാക്കുറിപ്പ്
ജഗൻ ജനിക്കുന്ന സമയത്ത് 'ഹരിമുരളീരവം' ചിത്രീകരിച്ച ഓർമ
മകന് ജഗന്നാഥൻ എന്നുപേരിടാനുണ്ടായ കാരണം
'വരവി'ന്റെ ഷൂട്ട് പൂർത്തിയായതിന്റെ സന്തോഷത്തിലും സമാധാനത്തിലുമിരുന്നാണ് ഇതുകുറിക്കുന്നത്. ഏതാണ്ട് ഒന്നരമാസത്തോളം നീണ്ടതായിരുന്നു ജോജുവിനൊപ്പമുള്ള ആദ്യസിനിമയുടെ ചിത്രീകരണം. മഴപോലെയാണ് ഓരോ സിനിമയും. പെയ്തുതോർന്നുകഴിയുമ്പോൾ ശാന്തമായൊരു തണുപ്പ് മനസ്സിലും ശരീരത്തിലും നിറയും. അത് വിട്ടുപോകുംമുമ്പേ അടുത്ത മഴയ്ക്ക് കൊതിക്കും. ജീവിതത്തിലെ അസുലഭമായ ചില നിമിഷങ്ങൾ കൂടി സമ്മാനിച്ചു എന്ന നിലയ്ക്ക് 'വരവ്' എന്ന ചിത്രം പ്രിയപ്പെട്ടതും പ്രധാനപ്പെട്ടതുമാകുന്നു. അതിന്റെ ഷൂട്ടിങ് മറയൂരിൽ നടക്കുമ്പോൾ ഹൈറേഞ്ചിനു താഴെ തൊടുപുഴയിൽ മൂത്ത മകൻ ജഗന്റെ ദിലീപ്സിനിമയും ചിത്രീകരിക്കുന്നുണ്ടായിരുന്നു. ജീവിതത്തിൽ ഒരിക്കലും സ്വപ്നം കാണാതിരുന്ന ഒന്നായിരുന്നു അത്. എന്റെയും മകന്റെയും സിനിമകൾ ഒരേസമയം അധികം ദൂരെയല്ലാത്ത രണ്ടിടങ്ങളിൽ മലയാളത്തിലെ രണ്ട് മുൻനിര നായകന്മാരെ വച്ച് ചിത്രീകരിക്കാൻ കഴിഞ്ഞത് കാലം ഞങ്ങൾക്ക് അനുവദിച്ചുതന്ന കാരുണ്യമെന്നോ ഭാഗ്യമെന്നോ പറയാം.
അപൂർവതയാണ് അതെന്ന് പലരും പറഞ്ഞു. മലയാളത്തിൽ ആദ്യമായി എന്ന് മാധ്യമങ്ങൾ കുറിച്ചു. കേൾക്കുമ്പോഴും കാണുമ്പോഴും സന്തോഷം മാത്രമാണ് ഉള്ളിൽ. സർവ്വേശ്വരന് മുന്നിൽ കൈകൂപ്പുന്നു. അപാരമായ ദയാവായ്പിന് മുന്നിൽ പ്രണമിക്കുന്നു. എല്ലാം നിയന്ത്രിക്കുന്ന ശക്തിയുടെ 'സംവിധാനമികവ്' ഇവിടം കൊണ്ട് തീരുന്നില്ല. അത് പിന്നെയും പല വഴിത്താരകളിലൂടെ കൊണ്ടുപോകുകയാണ്. ഈ പംക്തിയിൽ രണ്ട് മൂന്ന് ആഴ്ചയായി എഴുതിക്കൊണ്ടിരിക്കുന്നത് മോഹൻലാലിനൊപ്പമുള്ള എന്റെ ആദ്യ സിനിമയായ 'ആറാംതമ്പുരാനെ'ക്കുറിച്ചാണ്. അതിലെ നായകന്റെ പേരാണ് ജഗന്നാഥൻ. ആ പേരുതന്നെയാണ് ഞാൻ ആദ്യമകന് നല്കിയതും. ഇപ്പോൾ അവൻ വളർന്ന് സംവിധായകനായിത്തീർന്നിരിക്കുന്നു. ഞങ്ങളുടെ രണ്ടാളുടെയും സിനിമകൾ ഒരേസമയത്ത് ചിത്രീകരിക്കപ്പെടുന്നു. അതിനിടയ്ക്ക് ഞാൻ അവന്റെ പേരിന് പിന്നിലെ സിനിമയെക്കുറിച്ച് എഴുതിക്കൊണ്ടിരിക്കുന്നു.
ഇന്ന് നവംബർ മാസം 24-ാം തീയതി 'ആറാംതമ്പുരാനെ'യും ജഗന്നാഥനെയും കുറിച്ചുള്ള ഓർമകളുമായി വീണ്ടും പ്രിയപ്പെട്ട വായനക്കാരിലേക്ക് എത്തുന്നത് ഒരു വിശേഷദിവസത്തിലാണ് എന്ന പ്രത്യേകത കൂടിയുണ്ട്. വർഷങ്ങൾക്ക് മുമ്പ്,1997ലെ നവംബർ മാസത്തിൽ,ഇതേ തീയതിയിൽ 'ആറാംതമ്പുരാനി'ലെ ഏറ്റവും പ്രശസ്തമായ 'ഹരിമുരളീരവം' എന്ന പാട്ട് ഷൂട്ട് ചെയ്യുന്നതിനിടയ്ക്കായിരുന്നു എന്റെ മൂത്ത മകൻ പിറന്നത്. അതെ,ഇന്ന് ജഗന്റെ പിറന്നാളാണ്. ജഗൻ പിറന്ന ആ നാളിന്റെ ഓർമ കൂടിയാണ് എനിക്ക് 'ആറാംതമ്പുരാൻ'. ഞാനും ജഗനും ഒരേസമയം രണ്ട് വ്യത്യസ്തസിനിമകൾക്കായി ആക്ഷൻ പറയുമ്പോൾ, അതിനിടയ്ക്ക് ഞാൻ 'ആറാംതമ്പുരാനെ'ക്കുറിച്ച് എഴുതിക്കൊണ്ടിരിക്കുമ്പോൾ,ജഗന്റെ പിറന്നാൾ വരുന്നു. അന്ന് ഞാൻ വീണ്ടും 'ആറാംതമ്പുരാനെ'യും ജഗൻ എന്ന നായകനെയും കാലതീതമായ ആ പാട്ടിനെയും അതിനിടയിൽ എന്റെ ആദ്യമകന്റെ പിറവിയെയും ഓർമിക്കുന്നു...കാലമേ..നന്ദി...
ശിവന്റെ പര്യായങ്ങൾ നായകർക്ക് പേരായി നല്കുന്നതായിരുന്നു എന്റെ രീതി. അതിൽ നിന്ന് ഒരു വ്യത്യസ്തത ആയിക്കൊള്ളട്ടെ എന്നുവിചാരിച്ചാണ് രഞ്ജിത് 'ആറാംതമ്പുരാനി'ലെ നായകന് ജഗന്നാഥൻ എന്നുപേരിട്ടത്. ജഗത്തിന്റെ നാഥൻ അഥവാ മഹാവിഷ്ണു എന്നർഥമാണല്ലോ ജഗന്നാഥൻ എന്ന പേരിന്. അങ്ങനെ നോക്കുമ്പോൾ കണിമംഗലത്തേക്കെത്തുന്ന ലാലിന്റെ കഥാപാത്രത്തിന് ആ പേര് നന്നേ ഇണങ്ങുമായിരുന്നു.
'ആറാംതമ്പുരാന്റെ' ഷൂട്ടിങ്ങ് ചെന്നൈയിൽ നടക്കുമ്പോഴാണ് ചിത്ര പ്രസവത്തിനായി ആശുപത്രിയിൽ അഡ്മിറ്റായത്. സാധാരണ ഇത്തരം സന്ദർഭങ്ങളിൽ ഭർത്താവിന്റെ സാമീപ്യം അത്യാവശ്യമാണെന്നാണ് എല്ലാവരും പറയുക. എനിക്കും ആഗ്രഹമുണ്ടായിരുന്നു ആദ്യത്തെ കുഞ്ഞിന്റെ ജനനനേരത്ത് അവിടെയുണ്ടാകാൻ. പക്ഷേ ചെയ്യുന്ന ജോലി സിനിമയാണ്. ഒരുപാട് പേരുടെ അധ്വാനവും അതിലേറെ ഒരുപാട് പണവും ചെലവഴിക്കപ്പെടുന്ന തൊഴിൽമേഖല. നമ്മൾ മൂന്നോ നാലോ ദിവസത്തേക്ക് നമ്മുടെ ആഗ്രഹസാക്ഷാത്കാരത്തിനായി മാറിനിന്നാൽ നഷ്ടവും ബുദ്ധിമുട്ടും വരുന്നത് ആ സെറ്റിലെ നായകൻ മോഹൻലാൽ തൊട്ട് ലൈറ്റ് ബോയി വരെയുള്ളവർക്കാണ്. അതിലേറെ നഷ്ടം നിർമാതാവിനുമുണ്ടാകും.
അതുകൊണ്ട് ജോലിയാണ് ഇത്തരം സന്ദർഭങ്ങളിൽ പ്രധാനം. അപ്പോൾ ഒരു പട്ടാളക്കാരനെയോ പോലീസുകാരനെയോ പത്രപ്രവർത്തകനെയോ വൈമാനികനെയോ ഒക്കെപ്പോലെയുള്ള ഒരാൾതന്നെയായിരിക്കും ഒരു സിനിമാസംവിധായകനും. അതുമാത്രവുമല്ല, നമ്മളെപ്പോലെ അച്ഛനാകാൻ കാത്തിരിക്കുന്ന ആരെങ്കിലുമൊക്കെ ആ സിനിമയുടെ സെറ്റിൽ വേറെയുമുണ്ടാകാം. പക്ഷേ അയാളും ഒരുപക്ഷേ എന്നെപ്പോലെ പോകാൻ പറ്റാത്ത അവസ്ഥയിലായിരിക്കും. കാരണം അയാൾക്കും പ്രധാനം ആ സിനിമതന്നെ.
രാവിലെ ഷൂട്ടിന് പോകും മുമ്പ് ചിത്രയെ ഫോണിൽ വിളിച്ചിരുന്നു. 'ധൈര്യത്തിൽ ആശുപത്രിയിലേക്ക് പൊയ്ക്കോളൂ..അവിടെയെത്തും മുമ്പ് ഞാനും എത്തിയിരിക്കും...എയർപോർട്ടിൽ നിന്നാണ് വിളിക്കുന്നത്..ഫ്ളൈറ്റ് കയറാൻ പോകുക ആണ്...'ഇങ്ങനെയൊക്കെ പറഞ്ഞ് ധൈര്യം കൊടുത്തു. എനിക്ക് അറിയാമായിരുന്നു ചിത്ര എന്റെ സാന്നിധ്യം ആഗ്രഹിക്കുന്നുണ്ടെന്ന്. വിഷമിക്കാതിരിക്കാൻ വേണ്ടി അങ്ങനെയൊക്കെപ്പറയാനേ ആകുമായിരുന്നുള്ളൂ. കാരണം അതായിരുന്നു സാഹചര്യം.
'ഹരിമുരളീരവം..' എന്ന പാട്ടാണ് ആ ദിവസങ്ങളിൽ ഷൂട്ട് ചെയ്തിരുന്നത്. 'നിന്‍ സ്വര മണ്ഡപ നടയിലുണര്‍ന്നൊരു, പൊന്‍ തിരിയായവനെരിയുകയല്ലോ.. നിന്‍ പ്രിയ നര്‍ത്തന വനിയിലുണര്‍ന്നൊരു, മണ്‍ തരിയായ് സ്വയമുരുകുകയല്ലോ...'എന്ന വരികളൊക്കെ ഷൂട്ട് ചെയ്യുമ്പോൾ എന്റെ മനസ്സും എരിയുകയായിരുന്നു. അച്ഛനാകാൻ പോകുന്ന ഒരാളുടെയുള്ളിലെ ആകാംക്ഷയുടെ എരിച്ചിൽ.
എന്റെ സഹോദരീഭർത്താവ് രതീഷ് തിരുവനന്തപുരത്തെ ആശുപത്രിയിലുണ്ട്. രാവിലെ തന്നെ രതീഷിനെ വിളിച്ച് എല്ലാ കാര്യങ്ങളും ഏല്പിക്കുകയും നിർമാതാവ് സുരേഷ് കുമാർ വിളിക്കുമ്പോൾ വിവരങ്ങൾ അറിയിക്കണമെന്ന് പറയുകയും ചെയ്തു. സുരേഷ് അന്ന് സെറ്റിലുണ്ട്. അദ്ദേഹത്തിന് രതീഷിനെ കിട്ടുന്ന ഫോൺ നമ്പർ കൊടുത്തു. 'എല്ലാം കാര്യങ്ങളും നോക്കിക്കൊള്ളാം, വിഷമിക്കേണ്ട...'എന്നുപറഞ്ഞ് സുരേഷ് എനിക്ക് ധൈര്യംപകർന്നു. എ.വി.എം സ്റ്റുഡിയോയിലായിരുന്നു ഷൂട്ട്. സുരേഷ് കുമാർ ഉച്ചയ്ക്ക് ഒരു പതിനൊന്നര മണിയായപ്പോൾ മുതൽ ഓരോമണിക്കൂർ ഇടവിട്ട് സ്റ്റുഡിയോയ്ക്കടുത്തുള്ള എസ്.ടി.ഡി ബൂത്തിൽ നിന്ന് രതീഷിനെ വിളിച്ച് ആശുപത്രിയിലെ വിവരങ്ങൾ തിരക്കും. ഓരോ തവണ സുരേഷ് പോയിവരുമ്പോഴും നെഞ്ചിടിപ്പോടെ ഞാൻ ആ സന്തോഷവാർത്തയ്ക്കായി കാത്തു.
ഒടുവിൽ ഉച്ചയ്ക്ക് രണ്ടേമുക്കാൽ- മൂന്നു മണിയായിക്കാണും. ക്യാമറയിൽ നിന്ന് തിരിഞ്ഞ് ഞാൻ നോക്കുമ്പോൾ ഉച്ചവെയിലിൽ നിന്ന് കയറിവരികയാണ് സുരേഷ്കുമാർ. ഭംഗിയുള്ള വെയിൽനാളങ്ങൾ പകർന്ന തിളക്കമുള്ള പ്രകാശത്തിലൂടെയുള്ള കാഴ്ച. കൈയിൽ രണ്ടു കവറുകളുണ്ട്. എന്താണ് പറയാൻ പോകുന്നത് എന്ന ആകാംക്ഷയിൽ ഹൃദയം പെരുമ്പറയായി. എന്റെ മനസ്സിൽ നിറഞ്ഞുകവിഞ്ഞുനിന്ന ചോദ്യം ദൂരെ നിന്ന് മനസ്സിലാക്കിയിട്ടെന്നവണ്ണം ആ വെയിൽവെളിച്ചത്തിൽ നിന്നുകൊണ്ട് തംപ്സ് അപ് കാണിച്ച് സുരേഷ് കുമാർ വിളിച്ചുപറഞ്ഞു:'തമ്പുരാൻ...തമ്പുരാൻ....' ജീവിതത്തിൽ ഒരിക്കലും മറക്കാനാകാത്ത കാഴ്ച.
അങ്ങനെ 28വർഷം മുമ്പ് ഇതുപോലൊരു നവംബർ 24ന്, ചെന്നൈയിൽ ഞാൻ ക്യാമറയ്ക്ക് പിന്നിൽ നിന്ന് മോഹൻലാലിനെ നോക്കിയ ഏതോ ഒരു നിമിഷത്തിൽ...അല്ലെങ്കിൽ 'ആക്ഷനെ'ന്നോ 'കട്ട്' എന്നോ പറഞ്ഞ ഏതോ ഒരു മുഹൂർത്തത്തിൽ ദൂരെ തിരുവനന്തപുരത്തെ ആശുപത്രിയിൽ എന്റെ ആദ്യകുഞ്ഞ് ജനിച്ചു-ആൺകുട്ടി. കുറച്ചുനേരത്തേക്ക് സന്തോഷം കൊണ്ട് കണ്ണുനിറയുംപോലെ തോന്നി. ക്യാമറയ്ക്ക് മുന്നിലുള്ള കാഴ്ചകളൊക്കെ മഞ്ഞിൽക്കൂടിയെന്നപോലെ...ഞാൻ ആദ്യമായി അച്ഛനായിരിക്കുന്നു..
സുരേഷ് കൊണ്ടുവന്ന കവറുകളിൽ ലഡു ആയിരുന്നു. അതിന്റെ മധുരം സെറ്റിൽ വിളമ്പുമ്പോൾ ഒരു മധുരനൊമ്പരമായിരുന്നു മനസ്സിൽ. ചിത്ര ഒറ്റയ്ക്കാണ്. അച്ഛനും അമ്മയും മാത്രമേ ആശുപത്രിയിലുള്ളൂ. എങ്ങനെയെങ്കിലുമൊന്ന് ആശുപത്രിയിലെത്തിയിരുന്നെങ്കിൽ എന്ന ആഗ്രഹം ഉള്ളിൽ തിക്കുമുട്ടിത്തുടങ്ങി. കുഞ്ഞിന്റെ മുഖം ഒന്ന് കണ്ടിരുന്നെങ്കിൽ....
'പോയിട്ടുവന്നോളൂ' എന്ന് എല്ലാവരും പറഞ്ഞു. അങ്ങനെ അന്ന് രാത്രി ഷൂട്ട് പൂർത്തിയാക്കി തിരുവനന്തപുരത്തിന് വിമാനം കയറി. അവിടെയെത്തി കുട്ടിയെ കണ്ട് പിറ്റേന്ന് ഉച്ചയ്ക്ക് വീണ്ടും ചെന്നൈയിൽ 'ആറാംതമ്പുരാന്റെ' സെറ്റിൽ. നേരത്തെ പറഞ്ഞപോലെ അന്ന് നിമിഷങ്ങൾക്ക് ലക്ഷങ്ങളുടെ വിലയാണ് ഒരു സിനിമാ സെറ്റിൽ.(അക്കാലത്ത് സിനിമാക്കണക്കുകൾ കോടിയിലേക്ക് വളർന്നിട്ടില്ല!) അത് മണിക്കൂറുകളാകുമ്പോൾ വില അനേകലക്ഷങ്ങളാകും. മോഹൻലാലിനെപ്പോലെ പൊന്നുംവിലയുള്ള ഒരു താരത്തെ രാവിലെ മുതൽ ഉച്ചവരെ വെറുതെയിരുത്തുന്നത് മൂലം നഷ്ടം നിർമാതാവിന് മാത്രമല്ല,ലാലിനുകൂടിയാണ്. കാരണം അദ്ദേഹത്തിന്റെ ഡേറ്റുകൾക്ക് അന്നും ഇന്നും അത്രയും ഉയർന്ന മൂല്യമാണ്. ഷൂട്ട് ചെയ്യാതെ നാലുമണിക്കൂർ വെറുതെ കളയുന്നത് ലാലിനോടു ചെയ്യുന്ന അപരാധമാണ്.
അതുകൊണ്ട് മകനെ കാണാനായി ഞാൻ പോയതിന്റെ പിറ്റേന്ന് രാവിലെ മുതൽ തിരിച്ചെത്തിയ ഉച്ചവരെയുള്ള സമയത്ത് 'ഹരിമുരളീരവ'ത്തിലെ ചില സീനുകൾ എടുത്തുതന്ന് സഹായിച്ചത് പ്രിയപ്പെട്ട പ്രിയദർശനാണ്. ലാൽ കടൽത്തീരത്തുകൂടി നടക്കുന്ന സീനൊക്കെ ഇങ്ങനെ പ്രിയൻ എടുത്തതാണ്. ചെന്നൈ വി.ജി.പിയിലായിരുന്നു അതിന്റെ ഷൂട്ട്. 'ഹരിമുരളീരവം' എന്ന പാട്ട് അങ്ങനെ എന്റെ ജീവിതത്തിലെ പ്രധാനപ്പെട്ട ഒരു നിമിഷത്തിന്റെ അടയാളം കൂടിയാണ്. ആ പാട്ട് ഷൂട്ട് ചെയ്തുതുടങ്ങുമ്പോൾ ഞാൻ അച്ഛനായിരുന്നില്ല. പക്ഷേ അത് പകർത്തിക്കഴിഞ്ഞപ്പോൾ ഞാൻ ഒരു അച്ഛനായിക്കഴിഞ്ഞിരുന്നു.
'ആറാംതമ്പുരാന്റെ' ഡബ്ബിങ് പൂർത്തിയായ ദിവസം ഇന്നും ഓർക്കുന്നു. തന്റെ അവസാനസീനും ഡബ്ബ് ചെയ്ത് കഴിഞ്ഞ് മോഹൻലാൽ എന്റെ അരികിലേക്ക് വന്നു. ഒരുനിമിഷം നോക്കിനിന്നശേഷം മുറുകെ കെട്ടിപ്പിടിച്ചു. അന്നത്തെ ആശ്ലേഷത്തിന്റെ ചൂട് ഇന്നും ഹൃദയത്തിലാണ് പതിഞ്ഞുകിടക്കുന്നത്. അന്നു വൈകീട്ട് ചൈന്നൈയിലെ വീട്ടിൽ ലാൽ എനിക്കായി അത്താഴമൊരുക്കി. ഒരു സിനിമയുടെ ഷൂട്ട് തുടങ്ങിയാൽ പിന്നെ ഞാൻ പൂർണമായും വെജിറ്റേറിയനായിരിക്കും. അത് ലാലിനും അറിയാം. അതുകൊണ്ട് അദ്ദേഹത്തിന്റെ ഭാര്യ സുചിത്ര പനീർ പോലെയുള്ളവ കൊണ്ടുള്ള പ്രത്യേകവിഭവങ്ങൾ ഒരുക്കി,സ്നേഹത്തോടെ വിളമ്പി. ആറാംഇന്ദ്രിയമുള്ളയാളാണ് ലാൽ. 'ആറാംതമ്പുരാൻ' തന്റെ ചലച്ചിത്രജീവിതത്തിൽ ചരിത്രം സൃഷ്ടിക്കാൻ പോകുന്ന സിനിമയാണെന്ന് അദ്ദേഹത്തിന് തോന്നിയിരിക്കണം. ഡബ്ബിങ് തീയറ്ററിലെ ആശ്ലേഷത്തിലും വീട്ടിലെ അത്താഴവിരുന്നിലും ഞാൻ അനുഭവിച്ചതും രുചിച്ചതും ആസ്വദിച്ചതും ലാലിന്റെയുള്ളിലെ ആഹ്ലാദത്തിന്റെ പങ്കുകൂടിയാണ്.
മകന് പേരിടാൻ നേരം എനിക്ക് മറ്റൊന്ന് ആലോചിക്കാനുണ്ടാ യിരുന്നില്ല-ജഗന്നാഥൻ. 'ജഗൻ' എന്നുവിളിക്കുന്ന ജഗന്നാഥൻ. അത് 'ആറാംതമ്പുരാൻ' എന്ന സിനിമ എനിക്ക് തന്ന സൗഭാഗ്യങ്ങൾക്കുള്ള കടപ്പാടാണ്. എന്റെ ആദ്യ മോഹൻലാൽ സിനിമയുടെ ഓർമയാണ്. എല്ലാം നിയന്ത്രിക്കുന്ന ജഗത്തിന്റെ നാഥനുമുന്നിലുള്ള സാഷ്ടാംഗനമസ്കാരമാണ്.
പ്രിയപ്പെട്ട മോഹൻലാൽ...നിങ്ങളുടെ നായകന്റെ പേരിലാണ് എന്റെ മകൻ ഇന്ന് വിളിക്കപ്പെടുന്നത്. ഞാൻ നിങ്ങളെ ക്യാമറയിൽ പകർത്തുമ്പോഴാണ് അവൻ ജനിച്ചത്. അവൻ ഭൂമിയിലേക്ക് വരുന്നനേരം ഞാൻ നോക്കിനിന്നിരുന്നത് നിങ്ങളെയായിരുന്നു...അതുകൊണ്ട് ജഗൻ എന്നത് എനിക്ക് ഏറ്റവും പ്രിയപ്പെട്ട പേരാണ്...നായകനാണ്....ഓർമയാണ്..
പ്രിയപ്പെട്ട ജഗൻ...നീ പിറന്നപ്പോൾ അച്ഛൻ അരികിലുണ്ടായിരുന്നില്ല. ഒരു ക്യാമറയ്ക്ക് പിന്നിൽ നില്കുകയായിരുന്നു. മുന്നിൽ സിനിമയായിരുന്നു. വൃന്ദാവനത്തിലെ മാധവനും രാധയുമായിരുന്നു... വർഷങ്ങൾക്കിപ്പുറം ഇന്ന് പിറന്നാൾദിനത്തിൽ നീയും ക്യാമറയ്ക്ക് പിന്നിൽ തന്നെയാണ്. നീയും 'ആക്ഷൻ' എന്ന് ഉച്ചത്തിൽ വിളിക്കുകയാണ്....നിനക്കുമുന്നിലും സിനിമയാണ്... ഇതിനപ്പുറം എന്തുഭാഗ്യമാണ് ഈ അച്ഛന് ലഭിക്കുക...അന്ന് നീ ഈ ലോകത്തേക്കെത്തിയ ദിവസം നല്കിയതുപോലുള്ള നൂറുനൂറുമ്മകൾ... മുന്നിലെ സിനിമയും ഈശ്വരനും നിനക്ക് കൂട്ടാകാൻ പ്രാർഥനകൾ...പിറന്നാൾ ആശംസകൾ...
കാലമേ..ഒരിക്കൽക്കൂടി നന്ദി....
(തുടരും)