വരും..'മൂക്കില്ലാരാജ്യത്ത് സീസൺ-2'

1991 മാർച്ചിൽ ആണ് 'മൂക്കില്ലാരാജ്യത്ത്' റിലീസ് ചെയ്തത്. ഞാൻ കഥ-തിരക്കഥ-സംഭാഷണം എഴുതി അശോകൻ-താഹ കൂട്ടുകെട്ട് സംവിധാനം ചെയ്ത ആ ചിത്രം സൂപ്പർ ഹിറ്റ് ആയിരുന്നു. ഇന്നും യുവതലമുറ ആസ്വദിക്കുന്ന ചിത്രമാണിത്. സോഷ്യൽ മീഡിയയിലും ട്രോളുകളിലും അതിലെ രംഗങ്ങൾ നിറഞ്ഞുനില്കുന്നുണ്ട്, ഇപ്പോഴും.

ചിത്രം റിലീസ് ചെയ്ത് 15 വർഷം കഴിഞ്ഞ് 2006-ൽ ആണെന്നാണ് ഓർമ. അതിന്റെ രണ്ടാം ഭാഗം എന്ന ചിന്ത മനസ്സിൽ കടന്നുവന്നു. കാലം കടന്നും പ്രായഭേദമെന്യേ ആസ്വദിക്കുന്ന ഒരു സിനിമയുടെ തുടർച്ച ഉണ്ടാവുന്നത് നല്ലതാണെന്ന് സംവിധായകൻ താഹയും അഭിപ്രായപ്പെട്ടു. ഞങ്ങൾ ഈ ആശയം പലരുമായും പങ്കുവെച്ചു. അങ്ങനെ അതിൽ താത്പര്യമെടുത്ത് ഒരു നിർമാതാവ് മുന്നോട്ടുവന്നു. അതിന്റെ ആലോചനയുമായി താഹയും ഞാനും കുറച്ച് ആഴ്ചകൾ ഒരുമിച്ച് ഇരിക്കുകയും ചെയ്തു. ഞാൻ കഥയുടെ ഏകദേശരൂപം തയ്യാറാക്കി. എന്നാൽ നിർമാതാവിന് അപ്രതീക്ഷിതമായുണ്ടായ വ്യക്തിപരമായ പ്രശ്നങ്ങൾ മൂലം ആ പദ്ധതി ഉപേക്ഷിച്ചു. താഹയും ഞാനും നിരാശരായി.

നീണ്ട ഇരുപതോളം വർഷങ്ങൾ പിന്നെയും കടന്നുപോയി. ഇടയ്ക്കൊക്കെ ചില സൗഹൃദ സംഭാഷണങ്ങളിൽ 'മൂക്കില്ലാരാജ്യത്ത്' രണ്ടാം ഭാഗം കടന്നുവരുമായിരുന്നു കാരണം അതിന്റെ സാധ്യത മനസ്സിൽ അത്രയ്ക്കും ഉറച്ച് സ്ഥാനം പിടിച്ചതാണ്. എന്നാൽ ആ സിനിമയിൽ അഭിനയിച്ച പ്രഗത്ഭരും പ്രസിദ്ധരുമായ അഭിനേതാക്കളുടെ ഒരു നീണ്ടനിര ഈ കാലയളവിനുള്ളിൽ നമ്മെ വിട്ടുപോയി. തിലകൻ, ഒടുവിൽ ഉണ്ണികൃഷ്ണൻ, കുതിരവട്ടം പപ്പു, മാള അരവിന്ദൻ, രാജൻ പി. ദേവ്, ഫിലോമിന, എൻ.എൽ ബാലകൃഷ്ണൻ, പറവൂർ ഭരതൻ, കൃഷ്ണൻകുട്ടി നായർ..നഷ്ടത്തിന്റെ ആഴം അളക്കാൻ ആവില്ല. പിന്നെ അപകടത്തെത്തുടർന്ന് അഭിനയരംഗത്തു നിന്ന് പിന്മാറിയ ജഗതി ശ്രീകുമാർ.. 2022-ൽ സംവിധായകരിലൊരാളായ അശോകനും നമ്മെ വിട്ടുപിരിഞ്ഞു.

ഒരിക്കലും മറക്കാനാവാത്ത ഓർമകളാണ് ഈ അനുഗൃഹീത കലാകാരന്മാരുമായുള്ള ആ സിനിമാക്കാലം സമ്മാനിച്ചത്. മുകേഷ്,സിദ്ദിഖ്, ജഗദീഷ്,വിനയപ്രസാദ്, കുഞ്ചൻ തുടങ്ങിയവർ ഇന്നും സജീവമായി രംഗത്തുണ്ട്. സുചിത്ര സിനിമാരംഗം വിട്ടു. 35 വർഷം കഴിഞ്ഞ ഈ കാലത്തും 'മൂക്കില്ലാരാജ്യത്ത്' എന്ന ചിത്രത്തിലെ രംഗങ്ങൾ ട്രോളുകളിലും സോഷ്യൽ മീഡിയാഭിത്തികളിലും എന്തിന് സിനിമ സെറ്റുകളിൽ പോലും ആഘോഷമാകുന്നത് കാണുമ്പോൾ ഉണ്ടാകുന്ന സന്തോഷം പറഞ്ഞറിയിക്കാൻ കഴിയില്ല.

'മൂക്കില്ലാരാജ്യത്ത്' പുറത്തിറങ്ങുമ്പോൾ വെറും 11വയസ്സുകാരനായിരുന്നു ഇന്നത്തെ സൂപ്പർതാരം ഫഫദ് ഫാസിൽ. അന്ന് ജനിച്ചിട്ടുപോലുമില്ലായിരുന്നു മലയാളസിനിമയെ ആദ്യമായി 300 കോടി നേട്ടത്തിലെത്തിച്ച 'ലോക'നായിക കല്യാണിപ്രിയദർശൻ. ഇവർ ഒരുമിച്ച് 'ഓടുംകുതിര ചാടും കുതിര' എന്ന സിനിമയുടെ റിലീസിന് മുന്നോടിയായി 'മൂക്കില്ലാരാജ്യത്തി'ലെ ഒരു സീൻ റീക്രിയേറ്റ് ചെയ്തതു കണ്ടപ്പോഴാണ് ആ ചിത്രം ഇന്നും ബാക്കിവയ്ക്കുന്ന സ്വാധീനത്തിന്റെ ആഴം എനിക്കുപോലും ബോധ്യപ്പെട്ടത്.

'മൂക്കില്ലാരാജ്യത്തി'ന്റെ രചയിതാവ് എന്ന നിലയിൽ ഇന്ന് കിട്ടുന്ന സ്വീകാര്യത വളരെ വിലപിടിപ്പുള്ളതാണ്. സിനിമാരംഗത്തുള്ള പലരും, ഇക്കഴിഞ്ഞ ദിവസങ്ങളിൽ പോലും അതിന്റെ തുടർച്ച ആലോചിച്ചു കൂടെ എന്നു ചോദിച്ച് പ്രോത്സാഹിപ്പിച്ചിരുന്നു. ആ ചിന്ത മനസ്സിൽകിടന്ന് മഥിക്കുമ്പോഴാണ് കാലത്തെ അതിജീവിച്ച ചിത്രത്തിന്റെ തുടക്കവും ഷൂട്ടും മറ്റു രസകരമായ സംഭവങ്ങളും ഓർമയിലെത്തുന്നത്.

എം.ടി.വാസുദേവൻനായരുടെ തിരക്കഥയിൽ അജയൻ സംവിധാനം ചെയ്ത പ്രശസ്ത ചിത്രമാണ് 'പെരുന്തച്ചൻ'. തന്നെക്കാൾ സർഗ്ഗസിദ്ധി മകനാണെന്ന് മനസ്സിലാക്കിയ ഒരു അച്ഛന്റെ അസൂയ ഇതിവൃത്തമായ സിനിമ. കാലങ്ങളായി പ്രചാരത്തിലുള്ള ഐതിഹ്യത്തിന്റെ പിൻബലമുള്ള തിരക്കഥ. സഹൃദയരുടെ പ്രശംസ പിടിച്ചു പറ്റിയ സിനിമ. മഹാനടനായ തിലകന്റെ ഭാവപ്പകർച്ച പെരുന്തച്ചനെ ജീവസുറ്റതാക്കി. കപ്പിനും ചുണ്ടിനുമിടയിൽ മികച്ച നടനുള്ള ദേശീയ പുരസ്കാരം തിലകന് നഷ്ടപ്പെട്ടു അതിൽ മലയാളികൾ വേദനിച്ചു.

'പെരുന്തച്ച'ന്റെ ഓർമകൾ ഇവിടെ പരാമർശിക്കുന്നത് മറ്റൊരു സാഹചര്യത്തിലാണ്. 'പെരുന്തച്ചന്റെ' ചിത്രീകരണം പൂർത്തിയാക്കിയ ശേഷമാണ് തിലകൻ ചേട്ടൻ 'മൂക്കില്ലാരാജ്യത്തി'ൽ അഭിനയിക്കാൻ എത്തിച്ചേരുന്നത്. എറണാകുളവും പരിസരപ്രദേശങ്ങളുമാണ് ലൊക്കേഷൻ. എറണാകുളത്തെത്തിയ തിലകൻ ചേട്ടനോട് ഹോട്ടൽ മുറിയിൽ വെച്ച് സംവിധായകൻ അശോകനാണ് കഥയും കഥാപാത്രവും വിവരിച്ചു കൊടുത്തത്. ഞാനും താഹയും തിരക്കഥയിൽ ചില മിനുക്കുപണികളുമായി മറ്റൊരു ഹോട്ടലിലായിരുന്നു. 'തിലകൻ ചേട്ടന് സംഗതി ഇഷ്ടപ്പെട്ടു.. വലിയ സന്തോഷത്തിലാണ്..'- അശോകൻ വന്ന് ഞങ്ങളോട് പറഞ്ഞു. പൊതുവേ പരുക്കൻ, ഗൗരവ കഥാപാത്രങ്ങളായി സ്ക്രീനിൽ വരുന്ന തിലകൻ ചേട്ടൻ ഈ കഥാപാത്രത്തോട് എങ്ങനെ പ്രതികരിക്കുമെന്ന് എല്ലാവർക്കും സംശയമുണ്ടായിരുന്നു. അശോകൻ പറഞ്ഞതുകേട്ടതോടെ ആ പേടി മാറി.

അടുത്ത ദിവസം തിലകൻ ചേട്ടൻ ലൊക്കേഷനിലെത്തി. അദ്ദേഹത്തിനായി ഒരു വിഗ്ഗ് തയ്യാറാക്കി വെച്ചിരുന്നു. മേക്കപ്പിനു മുമ്പ് വിഗ്ഗ് അദ്ദേഹം ഒന്ന് പരിശോധിച്ചു. അതു കയ്യിൽ വെച്ചുകൊണ്ട് ഒരു നിമിഷം അദ്ദേഹം എന്തോ ആലോചിക്കുന്നത് പോലെ തോന്നി. അതിനുശേഷം, അടുത്തുനിന്നിരുന്ന ഞങ്ങളെ നോക്കി ചോദിച്ചു: 'അല്പം മാനസിക വിഭ്രാന്തിയുള്ള കഥാപാത്രമല്ലേ.. ചെറിയ വട്ടുപോലെ.. അങ്ങനെയുള്ള ഒരാൾ മുടി വെട്ടിയൊതുക്കി ചീകിവയ്ക്കുമോ..? സംവിധായകരുടെയും എന്റെയും മനസ്സിൽ ഒരു മിന്നൽപ്പിണർവീശി. 'പിന്നെ എന്തു ചെയ്യും..?'- ഞങ്ങൾ ഒരുമിച്ചു ചോദിച്ചു. ഒരു ചെറിയ ചിരിയോടെ തിലകൻ ചേട്ടൻ പറഞ്ഞു: പകുതി മുടി പെരുന്തച്ചൻ കൊണ്ടുപോയി ബാക്കി.. ഇവിടെ പൊയ്ക്കോട്ടെ.. ഒരു ബാർബറെ വിളിക്ക്...'

വിഗ്ഗ് മേശപ്പുറത്ത് വെച്ചശേഷം അദ്ദേഹം ഒരു കസേരയിൽ പോയി ഇരുന്നു. പിന്നെ എല്ലാം വളരെ പെട്ടെന്നായിരുന്നു. തിരക്കഥയുടെ അതിർത്തികൾ ഭേദിച്ച് ഒരു മഹാനടൻ കഥാപാത്രത്തെ ഉള്ളിൽ ആവാഹിച്ചതിന്റെ ബഹിർസ്ഫുരണമായിരുന്നു അത്. കേശവൻ നായർ- കേശുവായി. തലമുണ്ഡനം ചെയ്ത തിലകൻ പിറവിയെടുത്തു. 'മൂക്കില്ലാരാജ്യത്ത്' എന്ന സിനിമയിലെ എക്കാലത്തെയും ഹൈലൈറ്റ് തിലകനാണ്, ആ രോമരഹിതമായ തലയാണ്.

ആ സഫലമായ സിനിമാജീവിതത്തെ വിലയിരുത്തിയ പ്രശസ്ത നിരൂപകരെല്ലാം തിലകന്റെ കഥാപാത്രത്തെ എടുത്തുപറഞ്ഞു. സി.എസ്.വെങ്കിടേശ്വരൻ മാതൃഭൂമി ആഴ്ചപ്പതിപ്പിലെഴുതിയ ലേഖനത്തിലെ പരാമർശം ഒരു ഉദാഹരണം. അദ്ദേഹത്തിന്റെ അപാരമായ റെയ്ഞ്ച് രേഖപ്പെടുത്താൻ ആ കഥാപാത്രം നിമിത്തമായി. അതൊരു ക്ലാസിക് പെർഫോമൻസ് ആയി മലയാള സിനിമയിൽ ചരിത്രമായി.

ഇപ്പോൾ ഞാൻ ഓർക്കുന്നു.. തിരക്കഥ പൂർത്തിയായി. സംവിധായകരും ഞാനും നടീനടന്മാരെ കുറിച്ച് ആലോചിക്കുകയാണ്. ഏകദേശലിസ്റ്റ് തയ്യാറാക്കി നിർമാതാവിനു കൊടുക്കണം. അതിനുള്ള ആലോചനയ്ക്കിടെ ആ സമയത്ത് ഷൂട്ട് നടക്കുന്ന പല ചിത്രങ്ങളുടെയും അഭിനേതാക്കൾ‍ ചർച്ചാവിഷയമായി. അതേക്കുറിച്ച് പറയുമ്പോൾ 'മൂക്കില്ലാരാജ്യത്തി'ന്റെ തുടക്കത്തെക്കുറിച്ച് പറയണം..

(തുടരും)