ബോളിവുഡ് താരങ്ങളിൽ പലരുടെയും തിളക്കം സ്ക്രീനിൽ മാത്രം ഒതുങ്ങുന്നതല്ല. പലതരം ബിസിനസുകളിലേക്കും കൂടി അവർ അതിനെ പ്രതിഫലിപ്പിക്കുന്നു. തങ്ങളുടെ പേര് ഒരു ബിസിനസ് ബ്രാൻഡാക്കി മാറ്റുന്ന രീതി. ഇങ്ങനെ പലതരം മേഖലകളിൽ സാന്നിധ്യമറിയിച്ചവർ ഒരുപാടുണ്ട്. ഇവരിൽ ഏറെപ്പേരും രുചിയുടെ ലോകത്താണ് സ്വന്തം പേരും പ്രശസ്തിയും വിളമ്പി പണംവാരുന്നത്.
ബോളിവുഡിലെ പ്രധാന താരങ്ങൾക്കെല്ലാം മുംബൈയിൽ റസ്റ്ററന്റുകളുണ്ട്. അക്ഷരാർഥത്തിൽ സ്റ്റാർ പദവിയുള്ളവ. വ്യത്യസ്തമായ വിഭവങ്ങൾക്കൊപ്പം രാജകീയമായ അന്തരീക്ഷം കൊണ്ടും ഇവ ഭക്ഷണപ്രേമികളെ ആകർഷിക്കുന്നു. ചിലതിന്റെ വരുമാനം ഞെട്ടിക്കുന്നതാണ്. സെലിബ്രിറ്റി റസ്റ്ററന്റുകളിൽ അത്താഴം കഴിക്കാനും ആഘോഷവേളകൾ അവിസ്മരണീയമാക്കാനും എത്തുന്നവും ഒരുപാട്. ബോളിവുഡിന്റെ നക്ഷത്രത്തിളക്കം നിറയുന്ന ചില റസ്റ്ററന്റുകൾ പരിചയപ്പെടാം.
ശിൽപ്പ ഷെട്ടിയുടെ ബാസ്റ്റ്യൻ അറ്റ് ദി ടോപ്പ്
മുംബൈയിൽ ഏറ്റവും കൂടുതൽ ചർച്ച ചെയ്യപ്പെടുന്ന സെലിബ്രിറ്റി ഡൈനിങ് സ്‌പോട്ടുകളിൽ ഒന്നാണ് ബാസ്റ്റ്യൻ അറ്റ് ദി ടോപ്പ്. ബോളിവുഡ് സ്വപ്‌നസുന്ദരി ശിൽപ്പ ഷെട്ടിയാണ് ബാസ്റ്റ്യന്റെ ഉടമ. എപ്പോഴും തിരക്കേറിയ ഭക്ഷണശാല കൂടിയാണിത്. ദാദറിലെ കോഹിനൂർ സ്ക്വയറിന്റെ 48-ാം നിലയിൽ 21,000 സ്ക്വയർ ഫീറ്റിലാണ് ബാസ്റ്റ്യൻ. മുംബൈ മഹാനഗരത്തിന്റെ 360 ഡിഗ്രി കാഴ്ചയാണ് ഏറ്റവും വലിയ ആകർഷണം. മുംബൈ നഗരത്തിന്റെ വിസ്മയിപ്പിക്കുന്ന പനോരമിക് കാഴ്ചകൾ കൂടാതെ റൂഫ്‌ടോപ്പ് പൂള്‍, ആഡംബര ഇന്റീരിയര്‍ ഡിസൈന്‍ എന്നിവയാണ് മറ്റ് ആകർഷണങ്ങൾ. സീഫുഡ്, ഒക്ടേൻ കോക്ക്‌ടെയിലുകൾ എന്നിവയാണ് രുചിവൈവിധ്യങ്ങളിൽ ചിലത്.
ബർഖദത്തുമായുള്ള സംഭാഷണത്തിൽ കോളമിസ്റ്റ് ശോഭ ഡേ പറഞ്ഞത് ഈ റെസ്റ്റോറന്റ് പ്രതിദിനം ഏകദേശം 1,400 അതിഥികൾക്ക് വിരുന്നൊരുക്കുന്നു. പ്രതിദിനവരുമാനം രണ്ടുകോടി! വാരാന്ത്യങ്ങളിൽ ഇത് മൂന്നുകോടിയാകും. ശോഭാ ഡേ ബാസ്റ്റ്യനെക്കുറിച്ച് വാചാലയായത് ഇങ്ങനെ:' അവര്‍ രണ്ട് സിറ്റിങ്ങുകളൊരുക്കുന്നു.ഓരോന്നിലും 700 പേരെ വീതം. ദാദറിലെ റോഡില്‍ താഴെ വരെ വെയിറ്റിങ് ലിസ്റ്റ് ഉണ്ട്. ലാംബോര്‍ഗിനികളിലും ആസ്റ്റണ്‍ മാര്‍ട്ടിനുകളിലുമായി ആളുകള്‍ എത്തുന്നു. ഇവര്‍ ആരാണ്? എനിക്കൊരു ധാരണയുമില്ല. അവിടത്തെ ആവേശവും ജനക്കൂട്ടവും എന്നെ അദ്ഭുതപ്പെടുത്തി. ആ 700 പേരിലൊരാളെപ്പോലും എനിക്കറിയില്ലായിരുന്നു. യുവാക്കളായിരുന്നു എല്ലാം. അവർ ഏറ്റവുംമികച്ച ടെക്വീലയുടെ ബോട്ടിലുകള്‍ ഓര്‍ഡര്‍ ചെയ്യുകയായിരുന്നു. ഓരോ ടേബിളും ലക്ഷക്കണക്കിന് രൂപ ചെലവഴിച്ചു കൊണ്ടിരുന്നു. പക്ഷേ, എനിക്കവരാരാണെന്ന് യാതൊരു ധാരണയുമില്ല.'
കരൺ ജോഹറിന്റെ ന്യൂമ
കൊളാബയുടെ പൈതൃക പാതകളിൽ, ചലച്ചിത്ര നിർമാതാവ് കരൺ ജോഹർ ഒരു കൊളോണിയൽ ബംഗ്ലാവിനെ ഒരു സിനിമാറ്റിക് ഡൈനിങ് അനുഭവമാക്കി മാറ്റുന്നു. ആനന്ദകരമായ അന്തരീക്ഷം, നാടകീയത തുടങ്ങി ഓരോ കോണും അദ്ദേഹത്തിന്റെ സിനിമയിലെ ഫ്രെയിം പോലെ തോന്നിപ്പിക്കും. മുറികൾ സീനുകൾ പോലെയാണ്. ഓരോന്നിനും അതിന്റേതായ ശൈലി, വർണവിസ്മയങ്ങൾ എന്നിവയുണ്ട്. ആഡംബര യൂറോപ്യൻ ഡൈനിങ് ആണ് അവിടെ ലഭിക്കുക.
ഗൗരിഖാന്റെ ടോറി
ഷാരൂഖ് ഖാന്റെ ഭാര്യയും ഇന്റീരിയർ ഡിസൈനറും നിർമാതാവുമായ ഗൗരി ഖാന്റെ ആദ്യ റസ്റ്ററന്റ്. പാലി ഹിൽ റോഡ് പ്ലോട്ട് 21-ൽ ആണ് ഈ ഏഷ്യൻ റസ്റ്ററന്റ് സ്ഥിതി ചെയ്യുന്നത്. നിങ്ങൾ അവരിൽ നിന്നു പ്രതീക്ഷിക്കുന്നതുപോലെ..! അതിശയിപ്പിക്കുന്ന ലൈറ്റിങ്, ഗ്ലാമറസ് ഡീറ്റെയിലിങ്, ഏഷ്യൻ ഭക്ഷണം എന്നിവയാണ് ഹൈലൈറ്റ്. ലാറ്റിനമേരിക്കൻ വിഭവങ്ങളും വിളമ്പുന്നു. ടേബിൾവെയർ മുതൽ പ്ലേലിസ്റ്റ് വരെയുള്ള എല്ലാ ഘടകങ്ങളും ക്യൂറേറ്റഡ് ആയി തോന്നും. നിത്യേന നൂറുകണക്കിന് ആളുകൾ കുടുംബസമേതം ഭക്ഷണം കഴിക്കാൻ എത്തുന്ന റസ്റ്ററന്റ് വ്യത്യസ്ത അനുഭവമാണെന്ന് അവിടം സന്ദർശിച്ചവർ പറയുന്നു.
ഭാര്യയുടെ റസ്റ്ററന്റിലെ തന്തൂരി ചിക്കൻ ഷാരൂഖിന്റെ പ്രിയ വിഭവങ്ങളിലൊന്നാണ്. ഖാൻ കുടുംബത്തിന് സ്വകാര്യമായി ഇവിടേക്കെത്താൻ ഒരു രഹസ്യകവാടവുമുണ്ട്.
മലൈകയുടെ സ്കാർലറ്റ് ഹൗസ്
ബാന്ദ്രയിലെ പുനർനിർമിച്ച ഇന്തോ-പോർച്ചുഗീസ് ബംഗ്ലാവ് മലൈക അറോറ അതിവിശിഷ്ടമായ റസ്റ്ററന്റ് ആയി മാറ്റിയിരിക്കുന്നു. ക്യൂറേറ്റഡ് ചേരുവകളും, സ്വർണനിറങ്ങളിൽ തിളങ്ങുന്ന കോക്ടെയിലുകളും അവിടത്തെമാത്രം പ്രത്യേകതയാണ്. മകൻ അർഹാൻ ഖാനൊപ്പം ചേർന്നാണ് മലൈക ഈ റസ്റ്ററന്റ് തുടങ്ങിയത്.
പുനെയിലെ ബായ് മൂ ഡാൻ ഒരുക്കിയ പ്രത്യേക കോഫി പ്രോഗ്രാം,സുഷി ബാർ,മദ്രാസ് കറി,ബട്ടർനട്ട്, പ്രോട്ടീൻ ബാർ, മില്ലറ്റ് നൂഡിൽസ് തുടങ്ങി സ്കാർലറ്റ് അതിഥകൾക്ക് മുന്നിൽ അണിനിരത്തുന്ന വിശേഷങ്ങളുടെ പട്ടിക വലുതാണ്.
ബോബി ഡിയോളിന്റെ സം പ്ലേസ് എൽസ്
സൂപ്പർതാരം ബോബി ഡിയോളിന്റെ ഉടമസ്ഥതയിലുള്ള മുംബൈയിലെ ജനപ്രിയ റസ്റ്ററന്റ് ആണ് സം പ്ലേസ് എൽസ്. ലെവൽ 2, ജിയോ വേൾഡ് ഡ്രൈവ്, മേക്കർ മാക്‌സിറ്റി, ബാൻദ്ര കുർല കോംപ്ലക്‌സ് ഇതാണ് സം പ്ലേസ് എൽസിന്റെ മേൽവിലാസം. വടക്കേ ഇന്ത്യൻ, ചൈനീസ്, കോണ്ടിനെന്റൽ, ഇറ്റാലിയൻ, ജാപ്പനീസ് വിഭവങ്ങൾ എന്നിവയുടെ വൈവിധ്യമാർന്ന മൾട്ടി-ക്യുസിൻ മെനു സം പ്ലേസ് എൽസ് നൽകുന്നു.
ഊർജസ്വലവും സ്‌റ്റൈലിഷുമായ അന്തരീക്ഷം, ലൈവ് മ്യൂസിക്, ഡിജെ പാർട്ടികൾ, ബാർ തുടങ്ങിയ ഇവിടെയുണ്ട്. ജനപ്രിയ ഇനങ്ങളിൽ തെച്ച മുർഗ്, വോക്ക്-ടോസ്ഡ് ചില്ലി ചിക്കൻ, ഗൂർമെറ്റ് പിസകൾ തുടങ്ങിയ പ്രസിദ്ധമാണ്.
സഞ്ജയ് ദത്തിന്റെ സോളെയർ
മുംബൈയിലെ ബാന്ദ്ര കുർല കോംപ്ലക്‌സിലെ (ബികെസി) ഗ്രാൻഡ് ഹയാത്തിലാണ് ബോളിവുഡ് സൂപ്പർ താരം സഞ്ജയ് ദത്തിന്റെ സോളെയർ റസ്റ്ററന്റ്. ഈ വർഷം സെപ്റ്റംബറിൽ ആരംഭിച്ച റസ്റ്ററന്റ്, ഏഷ്യൻ, മെഡിറ്ററേനിയൻ, ആധുനിക ഇന്ത്യൻ വിഭവങ്ങൾ എന്നിവയാൽ പ്രസിദ്ധമാണ്. ലോകമെമ്പാടുമുള്ള യാത്രകളിൽനിന്നും രുചിയനുഭവങ്ങളിൽനിന്നും പ്രചോദനം ഉൾക്കൊണ്ടാണ് സഞ്ജയ് ദത്ത് തന്റെ റസ്റ്ററന്റിന് തുടക്കംകുറിച്ചത്.