ഓണാവധിക്കാലത്ത് കാണാനായി വിവിധ ഒടിടി പ്ലാറ്റ്ഫോമുകളിൽ നിറയെ സൂപ്പർഹിറ്റ് ചിത്രങ്ങൾ. തമിഴ്നാട് മുഖ്യമന്ത്രി ദളപതി വിജയ്യുടെ ജനനായകൻ, അക്ഷയ് കുമാർ-സുനിൽ ഷെട്ടി ടീമിന്റെ വെൽക്കം ടു ദി ജംഗിൾ ഉൾപ്പെടെയുള്ള ചിത്രങ്ങളാണ് നെറ്റ്ഫ്ലിക്സ്, ജിയോ ഹോട്ട്സ്റ്റാർ, സീ5, പ്രൈം വീഡിയോ, സോണിലിവ് തുടങ്ങിയവയിൽ സ്ട്രീമിങ് ആരംഭിച്ചത്.
ജനനായകൻ
തമിഴകത്തിന്റെ മുഖ്യമന്ത്രി ദളപതി വിജയ് നായകനായി എത്തിയ പൊളിറ്റിക്കൽ ആക്ഷൻ ത്രില്ലർ 'ജനനായകൻ' സീ5-ൽ സ്ട്രീമിങ് തുടങ്ങി. വിജയ് പോലീസ് ഓഫീസറുടെ വേഷത്തിലാണ് ചിത്രത്തിലെത്തുന്നത്. നിരവധി പ്രതിസന്ധികളിലൂടെ തിയേറ്ററുകളിലെത്തിയ ചിത്രം ദളപതിയുടെ കരിയറിലെ അവസാനചിത്രമായാണ് പ്രഖ്യാപിച്ചിരിക്കുന്നത്.
ജൂലായ് 23-നാണ് ചിത്രം ആഗോളതലത്തിൽ തിയേറ്ററുകളിൽ റിലീസ് ചെയ്തത്. ബോബി ഡിയോൾ, പൂജ ഹെഗ്ഡെ, മമിത ബൈജു, പ്രകാശ് രാജ്, പ്രിയാമണി, നരേൻ, ഗൗതം വാസുദേവ് മേനോൻ എന്നിവരാണ് പ്രധാന വേഷങ്ങൾ കൈകാര്യം ചെയ്യുന്നത്. കെവിഎൻ പ്രൊഡക്ഷൻസിന്റെ ബാനറിൽ വെങ്കട്ട് കെ. നാരായണയാണ് ചിത്രം നിർമിച്ചിരിക്കുന്നത്. അനിരുദ്ധ് രവിചന്ദറാണ് ചിത്രത്തിന്റെ സംഗീതസംവിധായകൻ.
വെൽക്കം ടു ദ് ജംഗിൾ
അക്ഷയ് കുമാർ, സുനിൽ ഷെട്ടി, അർഷാദ് വാർസി, ജാക്വലിൻ ഫെർണാണ്ടസ് തുടങ്ങിയ വൻ താരനിര അണിനിരക്കുന്ന ഹിന്ദി കോമഡി-ആക്ഷൻ ചിത്രമാണ് 'വെൽക്കം ടു ദ് ജംഗിൾ'. പ്രശ്നക്കാരായ ചിലർ ഒരു കാടിനെ അശാന്തമാക്കുന്നതാണ് ചിത്രത്തിന്റെ പ്രമേയം. ജിയോ ഹോട്ട്സ്റ്റാറിൽ കാണാം.
ചെന്നൈ ലൗ സ്റ്റോറി
ശ്രീ ഗൗരി പ്രിയ റെഡ്ഡി, കിരൺ അബ്ബവരം, ആദിത് അരുൺ എന്നിവർ പ്രധാന വേഷങ്ങളിലെത്തുന്ന തെലുങ്ക് റൊമാന്റിക് ഡ്രാമയാണ് 'ചെന്നൈ ലൗ സ്റ്റോറി'. ആദ്യ പ്രണയത്തിന്റെ തകർച്ച എങ്ങനെ കൂടുതൽ അർഥവത്തായ മറ്റൊരു ബന്ധത്തിലേക്ക് നയിക്കുന്നുവെന്ന് ചിത്രം സംസാരിക്കുന്നു. സോണിലിവിലൂടെ ചിത്രം കാണാം.
ദ് ഗ്രേറ്റ് ഗ്രാൻഡ് സൂപ്പർഹീറോ
ജാക്കി ഷ്രോഫ്, പ്രതീക് ബബ്ബർ, ഭാഗ്യശ്രീ എന്നിവർ അഭിനയിക്കുന്ന ഫാന്റസി കോമഡി ചിത്രമാണിത്. തന്റെ മുത്തച്ഛനു പ്രത്യേക കഴിവുകളുണ്ടെന്നും അന്യഗ്രഹജീവികളുടെ ആക്രമണത്തിൽ നിന്ന് ലോകത്തെ രക്ഷിക്കാൻ നിയോഗിക്കപ്പെട്ടയാളാണ് അദ്ദേഹമെന്നും വിശ്വസിക്കുന്ന ഒരു കൊച്ചുകുട്ടിയുടെ കഥയാണ് ചിത്രം പറയുന്നത്. സീ5-ൽ കാണാം.
പ്യാർ പ്രേമ കല്യാണം
ഇളൻ, സാൻവി മേഘ്ന എന്നിവർ പ്രധാന വേഷങ്ങളിലെത്തുന്ന തമിഴ് റൊമാന്റിക് കോമഡി ചിത്രമാണ് 'പ്യാർ പ്രേമ കല്യാണം'. വിവാഹശേഷം ഭാര്യയുടെ വീട്ടിൽ താമസിക്കാൻ തീരുമാനിക്കുന്ന നവദമ്പതികൾ നേരിടുന്ന അപ്രതീക്ഷിത സംഭവങ്ങളും സാംസ്കാരിക വൈരുധ്യങ്ങളുമാണ് ചിത്രത്തിന്റെ ഇതിവൃത്തം. നെറ്റ്ഫ്ലിക്സിൽ സ്ട്രീമിങ് ആരംഭിച്ചു.
ഡാർക്ക്
രഹസ്യങ്ങളും ഉദ്വേഗജനകമായ നിമിഷങ്ങളും നിറഞ്ഞ തമിഴ് സൈക്കോളജിക്കൽ ഹൊറർ ത്രില്ലർ ചിത്രമാണ് 'ഡാർക്ക്'. അപ്രതീക്ഷിതമായ ചില സത്യങ്ങൾ പുറത്തുവരുമ്പോൾ കഥാപാത്രങ്ങൾ അനുഭവിക്കുന്ന മാനസിക സംഘർഷങ്ങളാണു ചിത്രത്തിന്റെ ഇതിവൃത്തം. പ്രൈം വീഡിയോയിൽ ചിത്രം കാണാം.
ഫേസിങ് എൽ ചാപ്പോ
യഥാർഥ സംഭവങ്ങളെ പശ്ചാത്തലത്തിൽ ഒരുക്കിയ സ്പാനിഷ് ക്രൈം ഡ്രാമ പരമ്പര, 'ഫേസിങ് എൽ ചാപ്പോ' നെറ്റ്ഫ്ലിക്സിൽ സ്ട്രീമിങ് ആരംഭിച്ചു. മോഷ്ടിച്ച വാഹനം പരിശോധിക്കുന്നതിനിടെ പ്രശസ്ത മയക്കുമരുന്ന് മാഫിയാ തലവൻ എൽ ചാപ്പോയുടെ മുന്നിൽ അപ്രതീക്ഷിതമായി അകപ്പെടുന്ന രണ്ട് മെക്സിക്കൻ പോലീസ് ഉദ്യോഗസ്ഥരുടെ കഥയാണ് പരമ്പര പറയുന്നത്.