തിയേറ്ററിലേതുപോലെതന്നെ വമ്പൻ ആഘോഷമായി മാറുകയാണ് ഒടിടിയിലും 'കാന്താര'. നവംബർ മൂന്നു മുതൽ ഒമ്പതു വരെയുള്ള സ്ട്രീമിങ് ദിനങ്ങളിൽ ഏറ്റവും കൂടുതൽ കാഴ്ചക്കാരെ നേടിയത് ബ്രഹ്മാണ്ഡചിത്രമായ 'കാന്താര'യാണ്. ആമസോൺ പ്രൈമിൽ സ്ട്രീമിങ് തുടരുന്ന കാന്താരയ്ക്ക് 4.1 മില്യൺ കാഴ്ചക്കാരാണുണ്ടായത്. ഓർമാക്സ് മീഡിയ ആണ് ലിസ്റ്റ് പുറത്തുവിട്ടത്.
കഴിഞ്ഞ വാരം രണ്ടാം സ്ഥാനത്തായിരുന്നു ഋഷഭ് ഷെട്ടി ചിത്രം. ഒക്ടോബർ രണ്ടിന് ലോകമെമ്പാടും റിലീസ് ചെയ്ത് ചിത്രം 800 കോടിയിലേറെ തിയറ്റർ കളക്ഷനാണ് നേടിയത്. ഈ വർഷം ആദ്യം പുറത്തിറങ്ങിയ വിക്കി കൗശൽ ചിത്രം 'ഛാവയുടെ' കളക്ഷൻ റെക്കോർഡും കാന്താര മറികടന്നു. മലയാളസിനിമയിൽ പിറന്ന സർവകാല ഹിറ്റ് 'ലോക:'യാണ് രണ്ടാം സ്ഥാനത്തെന്നും ഓർമാക്സ് റിപ്പോർട്ട് ചെയ്യുന്നു. കഴിഞ്ഞ വാരം ഒന്നാം സ്ഥാനത്തുണ്ടായിരുന്ന കല്യാണിചിത്രം നാല് മില്യൺ വ്യൂസ് നേടി. ആഗോളതലത്തിൽ 300 കോടിയിലേറെ നേടിയും നിരവധി റെക്കോഡുകൾ ഭേദിച്ചുമാണ് 'ലോക:'യുടെ മുന്നേറ്റം.
ജിയോ ഹോട്ട്സ്റ്റാറിലൂടെ ഒക്ടോബർ 31 ന് സ്ട്രീമിങ് ആരംഭിച്ച 'ലോക:' അഞ്ച് ഭാഗങ്ങൾ ഉള്ള ബിഗ്ബജറ്റ് ഫാന്‍റസി സിനിമാറ്റിക് യൂണിവേഴ്‌സിലെ ആദ്യ ഭാഗമാണ്. കല്യാണി പ്രിയദർശൻ, നസ്ലിൻ എന്നിവരെക്കൂടാതെ ചന്തു സലിംകുമാർ, അരുൺ കുര്യൻ, ശരത് സഭ, നിഷാന്ത് സാഗർ, വിജയരാഘവൻ എന്നിവരും ചിത്രത്തിലെ പ്രധാന കഥാപാത്രങ്ങളാണ്. ദുൽഖർ സൽമാൻ, ടോവിനോ തോമസ്, സണ്ണി വെയ്ൻ എന്നിവരുടെ മാസ് അതിഥി വേഷവും പ്രേക്ഷകർ ആഘോഷിച്ചു.
മൂന്നാം സ്ഥാനം തെലുങ്ക് ചിത്രം 'മിറൈ'യ്ക്കാണ്. 3.1 മില്യൺ വ്യൂസ് ഈ ആഴ്ച നേടി. ജിയോഹോട്ട്സ്റ്റാറിലാണ് സ്ട്രീമിങ് തുടരുന്നത്. ആഭ്യന്തര തിയറ്ററുകളിൽനിന്ന് 91 കോടി നേടിയ 'മിറൈ' ആഗോള തലത്തിൽ 150 കോടിയിലേറെ കരസ്ഥമാക്കി. മലയാളി താരം ജയറാമും സിനിമയിൽ പ്രധാനകഥാപാത്രത്തെ അവതരിപ്പിക്കുന്നുണ്ട്. തെന്നിന്ത്യൻ സൂപ്പർതാരം ധനുഷ് നായകനായ 'ഇഡ്ഡലി കടൈ' ആണ് നാലാം സ്ഥാനത്തുള്ള ചിത്രം. നെറ്റ്ഫ്ളിക്സിൽ സ്ട്രീമിങ് തുടരുന്ന ചിത്രം 2.4 മില്യൺ വ്യൂസ് നേടി. തമിഴ്നാട് ഉൾനാടൻ ഗ്രാമത്തിലെ ഇഡ്ഡലി കടയും അതുമായി ബന്ധപ്പെട്ട ഒരു കുടുംബത്തിന്‍റെ കഥയുമാണ് ചിത്രം പറ‍യുന്നത്. ധനുഷിനൊപ്പം നിത്യാമേനോൻ, സത്യ രാജ്, സമുദ്രക്കനി, പാർഥിപൻ, അരുൺ വിജയ്, ശാലിനി പാണ്ഡെ, രാജ് കിരൺ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു.