പ്രമുഖ നടിയും നിർമാതാവ് എബ്രാഹാം മാത്യുവിന്‍റെ ഭാര്യയുമായ ഷീലു എബ്രഹാം വസ്ത്രവ്യാപാര രംഗത്തേക്ക്. അഭിനയ രംഗത്തുനിന്ന് ബിസിനസിലേക്കു തിരിയുന്ന താരങ്ങള്‍ക്കൊപ്പം ഇനി ഷീലുവും ഉണ്ട്. സോഷ്യല്‍മീഡിയയിലൂടെയാണ് തന്‍റെ സംരംഭകത്വ വിശേഷങ്ങള്‍ ഷീലു പങ്കുവെച്ചത്.
'മന്ദാര' എന്നാണ് ഷീലു എബ്രഹാമിന്റെ സാരി ബ്രാൻഡിന്റെ പേര്. സാരികൾക്ക് മാത്രമായൊരു ഓൺലൈൻ സ്റ്റോറാണ് ഷീലു ആരംഭിച്ചിരിക്കുന്നത്. ഇന്‍സ്റ്റഗ്രാം പേജിലൂടെ തങ്ങള്‍ നിലവില്‍ ഓര്‍ഡറുകള്‍ സ്വീകരിക്കുന്നുണ്ടെന്നും താരം വ്യക്തമാക്കി. പല ബിസിനസുകളുടെയും ബ്രാന്‍ഡ് മുഖമായിരുന്ന നടി ആദ്യമായാണ് സ്വന്തം ബിസിനസുമായി പ്രേക്ഷകര്‍ക്ക് മുന്നിലെത്തുന്നത്. നിരവധി പേരാണ് താരത്തിന് ആശംസകളുമായി രംഗത്തെത്തിയത്.