രജനികാന്ത് ചിത്രം 'ജയിലർ 2'-ൽ മോഹൻലാലിന്റെ സ്ക്രീൻ ടൈം വെട്ടിച്ചുരുക്കിയ സംഭവത്തിൽ പ്രതികരണവുമായി നിർമാതാവ് ആന്റണി പെരുമ്പാവൂർ. മോഹൻലാലും അനൂപ് സത്യനും ഒന്നിക്കുന്ന പുതിയ ചിത്രമായ 'എൽ 368'-ന്‍റെ പൂജാ ചടങ്ങിനിടയിലാണ് ആന്റണി പെരുമ്പാവൂർ ഇക്കാര്യത്തിൽ നിലപാട് വ്യക്തമാക്കിയത്.
ചിത്രത്തിൽ മോഹൻലാലിന്റെ വേഷം വെട്ടിച്ചുരുക്കിയതിലും ട്രെയിലറിലുണ്ടായിരുന്ന പല പ്രധാന രംഗങ്ങളും സിനിമയിൽ നിന്ന് ഒഴിവാക്കിയതിലും ആരാധകരെപ്പോലെ തങ്ങൾക്കും വലിയ വിഷമമുണ്ടെന്ന് അദ്ദേഹം പറഞ്ഞു.
മലയാളി പ്രേക്ഷകർ പൊതുവെ ഈ തീരുമാനത്തിൽ സന്തോഷത്തിലല്ലെന്നും, തങ്ങളും അതിൽ അത്ര തൃപ്തരല്ലെന്നും ആന്റണി പെരുമ്പാവൂർ മാധ്യമങ്ങളോടു വ്യക്തമാക്കി. സിനിമ റിലീസ് ചെയ്യുന്നതിനു മുൻപ് ഇത്തരം മാറ്റങ്ങൾ വരുത്തുന്നതിനെക്കുറിച്ച് മോഹൻലാലിന്റെ ടീമിനു മുൻകൂട്ടി വിവരം ലഭിച്ചിരുന്നില്ലെന്ന തരത്തിലുള്ള സൂചനകളാണ് അദ്ദേഹത്തിന്‍റെ പ്രതികരണത്തിലുള്ളത്.
ചിത്രത്തില്‍ മോഹന്‍ലാലിന്റെ രംഗങ്ങള്‍ വെട്ടിച്ചുരുക്കിയതില്‍ ആരാധകര്‍ക്കിടയില്‍ കടുത്ത പ്രതിഷേധം ഉയർന്നിരുന്നു. ട്രെയിലറില്‍ കാണിച്ച ചില നിമിഷങ്ങളും സിനിമയിലെ പ്രധാന ഭാഗങ്ങളും ഫൈനല്‍ കട്ടില്‍ ഒഴിവാക്കിയതാണ് ആരാധകരെ ചൊടിപ്പിച്ചത്. ഈ വിഷയത്തില്‍ പരസ്യമായി നിരാശ പ്രകടിപ്പിച്ച്, ചിത്രത്തിലെ മോഹന്‍ലാലിന്റെ പേഴ്‌സണല്‍ ഫാഷന്‍ സ്‌റ്റൈലിസ്റ്റും കോസ്റ്റ്യൂം ഡിസൈനറുമായ ജിഷാദ് ഷംസുദ്ദീന്‍ തന്നെ രംഗത്തെത്തുകയും ചെയ്തു. തന്റെ പ്രിയ താരത്തിന്റെ സാന്നിധ്യം ഇത്തരത്തില്‍ ചുരുക്കപ്പെട്ടതില്‍ കടുത്ത വിഷമമുണ്ടെന്നും, 'ജയിലർ 3' വരികയാണെങ്കില്‍ താന്‍ അതിന്റെ ഭാഗമാകില്ലെന്നുമാണ് ജിഷാദ് തുറന്നടിച്ചത്.