അവള് വരുന്നു, 'നാദിയ' ആയി! യാഷിനെ നായകനാക്കി ഗീതു മോഹൻദാസ് സംവിധാനം ചെയ്യുന്ന 'ടോക്സിക്: ഫെയറി ടെയില് ഫോര് ഗ്രോണ് അപ്സ്' എന്ന ചിത്രത്തിൽ ബോളിവുഡ് സുന്ദരി കിയാര അദ്വാനി എത്തുന്നത് ആരാധകരെ ഹരം കൊള്ളിക്കുന്ന ലുക്കിൽ. ടോക്സിക് നായകന് യാഷ് ആണ് ഞായറാഴ്ച ഇന്സ്റ്റഗ്രാമില് കിയാരയുടെ ഫസ്റ്റ് ലുക്ക് പുറത്തുവിട്ടത്. 'കിയാര അദ്വാനിയെ നാദിയയായി അവതരിപ്പിക്കുന്നു- ടോക്സിക്: ഫെയറി ടെയില് ഫോര് ഗ്രോണ് അപ്സ്' - പോസ്റ്റര് പങ്കുവച്ചുകൊണ്ട് യാഷ് എഴുതി. ഇന്സ്റ്റഗ്രാം ഉള്പ്പെടെയുള്ള സമൂഹമാധ്യമങ്ങളില് ഫസ്റ്റ് ലുക്ക് പോസ്റ്റര് പെട്ടെന്നുതന്നെ തരംഗമായി മാറി.
ഉയര്ന്ന സ്ലിറ്റുള്ള, തറയോളം നീളമുള്ള കറുത്ത ഗൗണ് ആണ് കിയാരയുടെ വേഷം. തിളങ്ങുന്ന സ്റ്റേജ് ലൈറ്റുകള്ക്ക് കീഴില്, സ്വര്ണക്കടലാസുകള് വിതറിയ, പ്രകാശമുള്ള വേദിയില് ആത്മവിശ്വാസത്തോടെ 'നാദിയ' നില്ക്കുന്നതായി കാണാം. സര്ക്കസ് പശ്ചാത്തലത്തിലാണ് പോസ്റ്റര് ഒരുക്കിയിരിക്കുന്നത്. വിഷാദച്ഛായയാണ് കിയാരയുടെ മുഖത്തിന്. യാഷ്, കിയാര അദ്വാനി എന്നിവര്ക്കൊപ്പം ഡാരെല് ഡി സില്വ, നയന്താര, അക്ഷയ് ഒബ്രോയി, ഹുമ ഖുറേഷി, ബെനഡിക്ട് ഗാരറ്റ്, സുദേവ് നായര്, നതാലി ബേണ്.കിലി പോൾ തുടങ്ങിയവരും പ്രധാനകഥാപാത്രങ്ങളെ അവതരിപ്പിക്കുന്നു.
യാഷും ഗീതു മോഹൻദാസും ചേർന്ന് രചിച്ച ടോക്സിക് ഇംഗ്ലീഷിലും കന്നഡയിലും ഒരേസമയം ചിത്രീകരിച്ചിട്ടുണ്ട്, കൂടാതെ ഹിന്ദി, തെലുങ്ക്, തമിഴ്, മലയാളം ഭാഷകളിലും ഡബ്ബ് ചെയ്യപ്പെടും. കെവിഎൻ പ്രൊഡക്ഷൻസിന്റെയും മോൺസ്റ്റർ മൈൻഡ് ക്രിയേഷൻസിന്റെയും കീഴിൽ വെങ്കട്ട് കെ. നാരായണയും യാഷും ചേർന്നാണ് ചിത്രം നിർമ്മിക്കുന്നത്.
ഗീതു മോഹന്ദാസിന്റെ ഭര്ത്താവും പ്രമുഖ കാമറാമാനും സംവിധായകനുമായ രാജീവ് രവിയാണ് ഛായാഗ്രഹണം നിര്വഹിച്ചിരിക്കുന്നത്. യാഷിന്റെ കെജിഎഫിന് സംഗീതം പകർന്ന രവി ബസ്രൂർ ആണ് സംഗീതസംവിധായകൻ. എഡിറ്റിങ് ഉജ്വൽ കുൽക്കർണിയാണ്. പ്രൊഡക്ഷന് ഡിസൈനര് ആബിദ് ടി.പി, കലാസംവിധാനം മിത്രരാജ് ചൗധരി, മോഹന് ബി. കെരെ. ജോൺ വിക്കിലൂടെ പ്രശസ്തനായ ഹോളിവുഡ് ആക്ഷൻ ഡയറക്ടർ ജെ.ജെ പെറിയും ദേശീയ അവാർഡ് ജേതാക്കളായ ആക്ഷൻ ഡയറക്ടർമാർ അൻപറിവും ചേർന്നാണ് ചിത്രത്തിലെ ഏറ്റവും പ്രധാനപ്പെട്ട ചില ആക്ഷൻ സീക്വൻസുകൾ ഒരുക്കിയത്. 2026 മാര്ച്ച് 19ന് ചിത്രം തിയറ്ററുകളിലെത്തും.