സൂപ്പർസ്റ്റാർ രജനികാന്ത് നായകനാകുന്ന 'ജയിലർ 2' എന്ന ചിത്രത്തിലൂടെ തമിഴ് സിനിമയിൽ അരങ്ങേറ്റം കുറിക്കുന്ന ബോളിവുഡ് താരം വിദ്യാ ബാലൻ. ലൊക്കേഷനിലെ അനുഭവവും സൂപ്പർസ്റ്റാർ രജനികാന്തിനെക്കുറിച്ചുള്ള വിശേഷങ്ങളും പങ്കുവെക്കുകയാണ്. ഒരു ദേശീയ മാധ്യമത്തിനു നൽകിയ അഭിമുഖത്തിൽ, ചിത്രത്തിലെ വൻ താരനിരയെക്കുറിച്ച് വിദ്യ പറഞ്ഞു. ആരെല്ലാമുണ്ടെങ്കിലും രജനികാന്ത് തന്നെയാണ് ജയിലറിലെ പ്രധാന ആകർഷണമെന്ന് വിദ്യ പറഞ്ഞു.
ഷൂട്ടിങ് സെറ്റിലെ രജനികാന്തിന്‍റെ ലളിതമായ പെരുമാറ്റത്തെക്കുറിച്ചും വിദ്യ ഓർത്തെടുത്തു. വലിയൊരു സൂപ്പർസ്റ്റാർ സെറ്റിലേക്ക് വരുമ്പോൾ വലിയ തരംഗവും ബഹളങ്ങളുമൊക്കെയാവും ഉണ്ടാകുക എന്നാണ് താൻ കരുതിയതെന്നും എന്നാൽ, സംവിധായകൻ നെൽസണോടും ക്യാമറാമാനോടും സംസാരിച്ചുകൊണ്ടിരിക്കുമ്പോൾ രജനികാന്ത് വളരെ ശാന്തനായി കടന്നുവരികയായിരുന്നുവെന്നും വിദ്യ പറഞ്ഞു. യാതൊരുവിധ ആഡംബരങ്ങളുമില്ലാത്ത അദ്ദേഹത്തിന്‍റെ ലാളിത്യവും സ്വാഭാവികതയുമാണ് പ്രേക്ഷകർക്ക് അദ്ദേഹത്തോടുള്ള സ്നേഹത്തിനു കാരണമെന്നും താരം കൂട്ടിച്ചേർത്തു.
പരിചയപ്പെട്ട ആദ്യനാളുകളിൽ തന്നെ വിദ്യയുടെ സോഷ്യൽ മീഡിയ റീലുകൾ കാണാറുണ്ടെന്നും ആസ്വദിക്കാറുണ്ടെന്നും രജനികാന്ത് വിദ്യയോട് പറഞ്ഞിരുന്നു. ഇത്രയും വലിയൊരു താരത്തിനൊപ്പം പ്രവർത്തിക്കുമ്പോഴുള്ള സമ്മർദം ഒഴിവാക്കാൻ ആ ചെറിയ വാക്ക് സഹായിച്ചുവെന്ന് വിദ്യ വെളിപ്പെടുത്തി. സെറ്റിൽ എല്ലാവരെയും പ്രോത്സാഹിപ്പിക്കുകയും ശാന്തമായ അന്തരീക്ഷം നൽകുകയും ചെയ്യുന്ന വ്യക്തിത്വമാണ് അദ്ദേഹത്തിന്‍റേതെന്നും വിദ്യ അഭിപ്രായപ്പെട്ടു.
തമിഴ് സിനിമാ ലോകത്തേക്ക് ചുവടുവെക്കാൻ കഴിഞ്ഞതിൽ സന്തോഷമുണ്ടെന്നും 'ജയിലർ 2' ഇതിന്‍റെ തുടക്കം മാത്രമായിരിക്കട്ടെയെന്ന് പ്രതീക്ഷിക്കുന്നതായും വിദ്യ പറഞ്ഞു. ചിത്രത്തിൽ 'കാന്ത' എന്ന ശക്തമായ കഥാപാത്രത്തെയാണ് വിദ്യാ ബാലൻ അവതരിപ്പിക്കുന്നത്.
നെൽസൺ സംവിധാനം ചെയ്ത് സൺ പിക്‌ചേഴ്‌സ് നിർമിക്കുന്ന 'ജയിലർ 2'വിൽ രജനികാന്ത് വീണ്ടും 'ടൈഗർ മുത്തുവേൽ പാണ്ഡ്യൻ എന്ന കഥാപാത്രമായാണ് എത്തുന്നത്. മോഹൻലാൽ, ശിവരാജ്‌കുമാർ, മിഥുൻ ചക്രവർത്തി, രമ്യാ കൃഷ്ണൻ, യോഗി ബാബു, എസ്.ജെ. സൂര്യ, സൂരാജ് വെഞ്ഞാറമൂട്, മിർണ തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്.