ബോളിവുഡിലെ ഇതിഹാസതാരം അമിതാഭ് ബച്ചന്‍റെ ജീവിതത്തിലെ ഏറ്റവും പ്രതിസന്ധി നിറഞ്ഞ കാലഘട്ടത്തെക്കുറിച്ചും അദ്ദേഹത്തിന്‍റെ കഠിനാധ്വാനത്തെക്കുറിച്ചും സൂപ്പർസ്റ്റാർ രജനികാന്ത് പങ്കുവെച്ച പഴയൊരു വീഡിയോ വീണ്ടും സമൂഹമാധ്യമങ്ങളിൽ തരംഗമാകുന്നു. അമിതാഭ് ബച്ചന്‍റെ ബിസിനസ് തകർച്ചയും, അതിൽ നിന്ന് കരകയറാൻ അദ്ദേഹം നടത്തിയ കഠിനാധ്വാനവുമാണ് രജനികാന്ത് വെളിപ്പെടുത്തിയത്.
1990-കളിൽ തന്‍റെ കരിയറിന്‍റെ ഉച്ചസ്ഥായിൽ നിൽക്കുമ്പോഴാണ് അമിതാഭ് ബച്ചൻ ‘അമിതാഭ് ബച്ചൻ കോർപ്പറേഷൻ ലിമിറ്റഡ്’ (എബിസിഎൽ) എന്ന പേരിൽ ഒരു നിർമാണ കമ്പനി ആരംഭിക്കുന്നത്. എന്നാൽ ഈ സംരംഭം വൻ പരാജയമായി മാറുകയും, തുടർന്ന് ബിഗ് ബി വലിയ സാമ്പത്തിക തകർച്ചയിലേക്കും കടക്കെണിയിലേക്കും വീഴുകയും ചെയ്തു. ഏകദേശം 90 കോടി രൂപയുടെ ഭീമമായ കടമാണ് അദ്ദേഹത്തിനുണ്ടായിരുന്നത്. ഈ പ്രതിസന്ധി ഘട്ടത്തിൽ അദ്ദേഹത്തിന് തന്‍റെ ജുഹുവിലെ വീട് ഉൾപ്പെടെയുള്ള പ്രധാന ആസ്തികൾ വിൽക്കേണ്ടി വന്നിരുന്നു.
ആ പ്രതിസന്ധി ഘട്ടത്തെക്കുറിച്ച് ഓർത്തെടുത്തുകൊണ്ട് രജനികാന്ത് പറഞ്ഞത് ഇങ്ങനെയാണ്: 'ആ സമയത്ത് ബോംബെ ഇൻഡസ്ട്രിയിലുള്ള പലരും അദ്ദേഹത്തെ പരിഹസിച്ചു. എന്നാൽ അമിതാഭ് ബച്ചൻ തളർന്നുപോയില്ല. തന്‍റെ 64-ാം വയസിൽ, ആരോഗ്യപരമായ നിരവധി ബുദ്ധിമുട്ടുകൾ ഉണ്ടായിരുന്നിട്ടും അദ്ദേഹം രാപകലില്ലാതെ അധ്വാനിച്ചു...'
കടങ്ങൾ പൂർണമായും വീട്ടുന്നതിനായി തുടർച്ചയായി മൂന്ന് വർഷത്തോളം ദിവസവും 18 മണിക്കൂർ വീതം അമിതാഭ് ബച്ചൻ ജോലി ചെയ്തുവെന്ന് രജനികാന്ത് പറയുന്നു. ഒടുവിൽ തന്‍റെ കഠിനാധ്വാനം കൊണ്ട് എല്ലാ കടങ്ങളും വീട്ടി എന്ന് മാത്രമല്ല, താൻ വിറ്റഴിച്ച പഴയ വീട് തിരികെ വാങ്ങുകയും അതേ ഗലിയിൽ തന്നെ മറ്റ് മൂന്ന് വീടുകൾ കൂടി സ്വന്തമാക്കുകയും ചെയ്തു. 'അതാണ് അമിതാഭ് ബച്ചൻ' എന്ന് പറഞ്ഞുകൊണ്ടാണ് രജനികാന്ത് അദ്ദേഹത്തോടുള്ള തന്‍റെ ആദരവ് പ്രകടിപ്പിച്ചത്. അമിതാഭ് ബച്ചന്‍റെ ജീവിതത്തിലെ പ്രചോദനാത്മകമായ ഏട് ഇപ്പോൾ ആരാധകരും ഏറ്റെടുത്തിരിക്കുകയാണ്.